ពលរដ្ឋជប៉ុនជាងមួយពាន់នាក់ បានប្រមូលផ្តុំគ្នានៅខាងក្រៅការិយាល័យនាយករដ្ឋមន្ត្រី នៅទីក្រុងតូក្យូកាលពីយប់ថ្ងៃសុក្រ ដោយទាមទារឲ្យលោកនាយករដ្ឋមន្ត្រី Sanae Takaichi ដកពាក្យសម្តីញុះញង់ថ្មីៗរបស់លោកស្រីទាក់ទងនឹងតំបន់តៃវ៉ាន់របស់ប្រទេសចិន។

ក្រុមបាតុករ បានស្រែកពាក្យស្លោកដូចជា៖«លោកនាយករដ្ឋមន្ត្រី Takaichi កុំបង្កសង្គ្រាម» «ដកចេញនូវការអត្ថាធិប្បាយរបស់លោកស្រីជាបន្ទាន់» «គោរពតាមរដ្ឋធម្មនុញ្ញ» ដោយបង្ហាញការព្រួយបារម្ភកាន់តែខ្លាំងឡើងអំពីទិសដៅគោលនយោបាយការពារជាតិថ្មីៗរបស់ជប៉ុន និងជំហរគោលនយោបាយការបរទេសរបស់លោកស្រី Takaichi។

អ្នកតវ៉ាម្នាក់ បាននិយាយថា៖«ខ្ញុំជឿថា រឿងនេះ រំលោភលើរដ្ឋធម្មនុញ្ញ។ ការលើកឡើងដែលមិនឲ្យស្ងប់សុខបែបនេះ ធ្វើឲ្យប៉ះពាល់ដល់ស្ថិរភាពក្នុងតំបន់។ អ្វីដែលសំខាន់ជាងនេះទៅទៀត ខ្ញុំគិតថា វាផ្ទុយនឹងមាត្រា ៩ នៃរដ្ឋធម្មនុញ្ញជប៉ុន ដូច្នេះគួរតែត្រូវបានដកចេញនូវពាក្យសម្តីនេះជាបន្ទាន់»។

ចំណែកអ្នកតវ៉ាម្នាក់ទៀត បាននិយាយថា៖«ខ្ញុំមានអារម្មណ៍ព្រួយបារម្ភយ៉ាងខ្លាំងចំពោះការអត្ថាធិប្បាយរបសលោកស្រី Takaichi។ ខ្ញុំសង្ឃឹមថា លោកស្រីចាប់ផ្តើមផ្តល់អាទិភាពដល់សន្តិភាព និងការទូត។ ការចំណាយលើយោធា បានកើនឡើងយ៉ាងខ្លាំង ហើយជីវិតប្រចាំថ្ងៃ មានអារម្មណ៍ថា មិនស្ថិតស្ថេររួចទៅហើយ»។  

កាលពីថ្ងៃទី ០៧ ខែវិច្ឆិកា លោកស្រី Takaichi បានធ្វើការអត្ថាធិប្បាយយ៉ាងច្បាស់ និងបង្កហេតុអំពីកោះ តៃវ៉ាន់នៅឯសភាតំណាងរាស្ត្រ ដោយអះអាងថា ស្ថានភាពបន្ទាន់របស់តៃវ៉ាន់ អាចជា «ស្ថានភាពគំរាមកំហែងដល់ការរស់រានមានជីវិត» សម្រាប់ប្រទេសជប៉ុន និងបញ្ជាក់ថា ជប៉ុនអាចប្រើប្រាស់អ្វីដែលគេហៅថា «សិទ្ធិការពារខ្លួនរួមគ្នា» សម្រាប់ការអន្តរាគមន៍ប្រដាប់អាវុធឆ្លងកាត់ច្រកសមុទ្រតៃវ៉ាន់៕