យន្តហោះយោធាសហរដ្ឋអាមេរិក ត្រូវបានគេមើលឃើញនៅអតីតមូលដ្ឋានកងទ័ពជើងទឹក Roosevelt Roads ស្ថិតក្នុងប្រទេសព័រតូរីកូ កាលពីថ្ងៃសៅរ៍ ។

រូបភាពវីដេអូឃ្លីបឃើញមន្រ្តីដាក់ចុះសម្ភារៈពីលើយន្តហោះដឹកទំនិញ ស្របពេលដែលសហរដ្ឋអាមេរិកបង្កើនសម្ពាធលើរដ្ឋាភិបាលរបស់ប្រធានាធិបតីវេណេស៊ុយអេឡាលោក Nicolas Maduro ។

នៅមូលដ្ឋានកងទ័ពជើងទឹកនោះ គេឃើញមានឧទ្ធម្ភាគចក្រ CH-53E Super Stallion យន្តហោះ MV-22 Osprey ចំនួន ៣គ្រឿង ខណៈដែលឧទ្ធម្ភាគចក្រឆ្មាំល្បាតឆ្នេរសហរដ្ឋអាមេរិកហោះសំកាំងពីលើមូលដ្ឋានដែលជាទីកន្លែងដ៏សំខាន់សម្រាប់ប្រតិបត្តិការក្នុងតំបន់ ។

ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃសៅរ៍ថា ដែនអាកាសពីលើ និងជុំវិញវេណេស៊ុយអេឡា នឹងត្រូវបិទទាំងស្រុង ប៉ុន្តែលោកពុំបានផ្តល់សេចក្តីលម្អិតបន្ថែមទៀតនោះទេ ។

គួរឲ្យដឹងថា សកម្មភាពសំណង់នៅអតីតមូលដ្ឋានកងទ័ពជើងទឹក Roosevelt Roads ដែលបានបិទកាលពីរយៈពេលជាង ២០ឆ្នាំមុន បានចាប់ផ្តើមដំណើរការឡើងវិញកាលពីថ្ងៃទី ១៧ ខែកញ្ញា ៕