ក្រុមជួយសង្រ្គោះឥណ្ឌូនេស៊ីនៅកោះភាគខាងជើងស៊ូម៉ាត្រា បន្តស្វែងរកមនុស្សបាត់ខ្លួន ៧៩នាក់ ក្រោយទឹកជំនន់សម្លាប់មនុស្ស ១៧៤នាក់ ។

តំបន់សហគមន៍ជាច្រើនបន្តជន់លិច ហើយក្រុមអាជ្ញាធរ ប្រឹងប្រែងស្តាឡើងវិញនូវថាមពល ហើយនិងបោសសម្អាតផ្លូវដែលត្រូវបានបិទដោយសារបំណាក់ដី ។

កាលពីថ្ងៃសុក្រកន្លងទៅ ប្រធានាធិបតីឥណ្ឌូនេស៊ីលោក Prabowo Subianto បានធ្វើអធិស្ឋានរបស់លោកទៅដល់អ្នកដែលរងផលប៉ះពាល់ដោយទឹកជំនន់ និងបំណាក់ដីនៅលើកោះស៊ូម៉ាត្រា ដោយលោកនិយាយថា រដ្ឋាភិបាលរបស់លោក នឹងបន្តបញ្ជូនជំនួយ ស្របពេលពិបាកចូលទៅដល់តំបន់រងគ្រោះ ។

លោកនិយាយថា ពួកយើងដឹងថា បងប្អូនប្រុស-ស្រីរបស់ពួកយើង កំពុងកាន់ទុក្ខដោយសារគ្រោះមហន្តរាយនៅតាមទីកន្លែងជាច្រើនក្នុងប្រទេសនេះ ពិសេសនៅខេត្តអាឆេ ខេត្តស៊ូម៉ាត្រាខាងលិច និងខេត្តស៊ូម៉ាត្រាខាងជើង ។ ពួកយើងសូមអធិស្ថានឲ្យព្រះការពារពួកគេ ហើយសូមឲ្យទុក្ខព្រួយរបស់ពួកគេបានធូរស្រាលឡើងវិញ ។

លោក Abdul Muhari គឺជាអ្នកនាំពាក្យទីភ្នាក់ងារកាត់បន្ថយគ្រោះមហន្តរាយជាតិឥណ្ឌូនេស៊ី និយាយថា ឥណ្ឌូនេស៊ីនឹងបន្តដឹកជំនួយ និងក្រុមជួយសង្រ្គោះតាមឧទ្ធម្ភាគចក្រ ទៅកាន់តំបន់រងផលប៉ះពាល់ ៕