អាជ្ញាធរសុខាភិបាលនៅដែនដីហ្កាហ្សាស្រ្ទីប បាននិយាយកាលពីថ្ងៃសៅរ៍ (២៩ វិច្ឆិកា) ថា ចំនួនមនុស្សសរុប ដែលត្រូវបញ្ជាក់ថាបានស្លាប់ នៅក្នុងការវាយលុករបស់អ៊ីស្រាអែល លើតំបន់ប៉ាឡេស្ទីនដ៏តូចចង្អៀតនេះ បានបន្តកើនឡើងលើសពី ៧ម៉ឺននាក់ហើយ បើទោះបីជាសង្រ្គាមបានបញ្ចប់ក្រោមបទឈប់បាញ់ដ៏ផុយស្រួយមួយក៏ដោយ។

ក្រសួងនេះបន្ថែមថា មនុស្ស ៣០១នាក់ ត្រូវដាក់បន្ថែមទៅក្នុងចំនួនអ្នកស្លាប់ ចាប់តាំងពីថ្ងៃព្រហស្បតិ៍កន្លងទៅ ដែលនាំឱ្យការស្លាប់សរុបកើនឡើងដល់ ៧០.១០០នាក់ ចាប់តាំងពីសង្រ្គាមផ្ទុះឡើងនៅឆ្នាំ២០២៣មក។ យោងតាមសេចក្តីថ្លែងការណ៍ មនុស្សមួយចំនួនបានស្លាប់ក្នុងការវាយប្រហារថ្មីៗរបស់អ៊ីស្រាអែល ហើយតួលេខស្លាប់ដែលនៅសល់ ត្រូវយកចេញពីគំនរបាក់បែកក្នុងមួយរយៈមកនេះ។

ចាប់តាំងពីបទឈប់បាញ់បានចូលជាធរមាននៅថ្ងៃទី១០ ខែតុលា មក ការស្លាប់ដែលត្រូវរាយការណ៍ បានបន្តកើនឡើងឥតឈប់ឈរ ខណៈអាជ្ញាធរឆ្លៀតឱកាសពេលដែលស្ថានភាពស្ងប់ស្ងាត់ ដើម្បីស្វែងរកសាកសពអ្នកស្លាប់នៅក្រោមគំនរបាក់បែក។

មិនមានការអត្ថាធិប្បាយភ្លាមៗពីអ៊ីស្រាអែលទេ ដែលតែងចោទពីភាពត្រឹមត្រូវនៃតួលេខការស្លាប់នៅហ្កាហ្សា ទោះបីជាខ្លួនមិនទាន់ចេញផ្សាយការប៉ាន់ស្មានផ្ទាល់ខ្លួនក៏ដោយ។ ការទម្លាក់គ្រាប់បែករបស់អ៊ីស្រាអែលលើហ្កាហ្សា - ដែលបញ្ឆេះឡើងដោយការវាយប្រហាររបស់ក្រុមហាម៉ាស លើអ៊ីស្រាអែល នៅថ្ងៃទី៧ ខែតុលា ឆ្នាំ២០២៣ - បានកម្ទេចផ្នែកភាគច្រើននៃតំបន់នេះ ដែលធ្វើឱ្យពិបាកក្នុងការប្រមូលព័ត៌មានត្រឹមត្រូវពីតួលេខអ្នកស្លាប់ និងរបួស៕