យោងតាមឯកសារមួយពីក្រសួងការបរទេសអាមេរិក ដែលមើលឃើញដោយសារព័ត៌មានរ៉យទ័រ បានឱ្យដឹងថា រដ្ឋបាលរបស់លោកប្រធានាធិបតី Donald Trump បានបញ្ជាឱ្យមន្ត្រីការទូតរបស់ខ្លួននៅទូទាំងពិភពលោក បញ្ឈប់រាល់ដំណើរការទិដ្ឋាការសម្រាប់ជនជាតិអាហ្វហ្គានីស្ថាន ដែលជាការផ្អាកយ៉ាងមានប្រសិទ្ធភាពនូវកម្មវិធីអន្តោប្រវេសន៍ពិសេសសម្រាប់ជនជាតិអាហ្វហ្គានីស្ថានទាំងឡាយណាដែលបានជួយអាមេរិក អំឡុងពេលកាន់កាប់អស់រយៈពេល ២០ឆ្នាំ។

ឯកសារដែលផ្ញើទៅកាន់ប៉ុស្តិ៍ការទូតអាមេរិកទាំងអស់ កាលពីថ្ងៃសុក្រ (២៨ វិច្ឆិកា) កន្លងទៅ បាននិយាយថា៖ ដោយមានប្រសិទ្ធភាពភ្លាមៗ មន្ត្រីកុងស៊ុលត្រូវបានណែនាំឱ្យបដិសេធនូវរាល់ពាក្យស្នើសុំទិដ្ឋាការជនអន្តោប្រវេសន៍ ឬមិនមែនអន្តោប្រវេសន៍ ពីជនជាតិអាហ្វហ្គានីស្ថាន រួមទាំងអ្នកដាក់ពាក្យស្នើសុំទិដ្ឋាការអន្តោប្រវេសន៍ពិសេស។

ចំណាត់ការដ៏តឹងរ៉ឹងនេះបានកើតឡើង បន្ទាប់ពីកាលពីថ្ងៃពុធកន្លងទៅ អតីតសមាជិកម្នាក់នៃអង្គភាពដែលគាំទ្រដោយ CIA របស់អាហ្វហ្គានីស្ថាន ត្រូវចោទប្រកាន់ពីបទបាញ់ប្រហារទាហានឆ្មាំជាតិអាមេរិកពីរនាក់នៅក្រុងវ៉ាស៊ីនតោន ហើយម្នាក់ក្នុងចំណោមនោះបានស្លាប់។

កាលពីថ្ងៃសៅរ៍ ក្រសួងការបរទេសអាមេរិក បានចង្អុលទៅសេចក្តីថ្លែងការណ៍លើវេទិកាសង្គម X របស់ប្រមុខការទូតអាមេរិក លោក Marco Rubio កាលពីថ្ងៃសុក្រ ដែលក្នុងនោះលោកនិយាយថា សំណើទិដ្ឋាការពី "បុគ្គលទាំងអស់" ដែលធ្វើដំណើរក្រោមលិខិតឆ្លងដែនអាហ្វហ្គានីស្ថាន នឹងត្រូវ "ផ្អាក"។ នៅដើមសប្តាហ៍នេះ សេវាសញ្ជាតិ និងអន្តោប្រវេសន៍របស់អាមេរិក បានបញ្ឈប់ដំណើរការនៃសំណើអន្តោប្រវេសន៍របស់ជនជាតិអាហ្វហ្គានីស្ថាន រួចទៅហើយ ដោយមិនកំណត់៕