បណ្ដាក្រុមហ៊ុនអាកាសចរណ៍ពិភពលោក បានព្យាយាមជួសជុលបញ្ហាផ្នែកប្រព័ន្ធសូហ្វវែរនៅលើយន្តហោះអ៊ែរបើស (Airbus) ប្រភេទ A320 កាលពីថ្ងៃសៅរ៍ (២៩ វិច្ឆិកា) ខណៈការប្រមូលយកទៅជួសជុលវិញដោយផ្នែក ពីក្រុមហ៊ុនផលិតយន្តហោះអឺរ៉ុបមួយនេះ បានប៉ះពាល់ដល់ជើងហោះហើររាប់រយជើងនៅតំបន់អាស៊ី និងអឺរ៉ុប ហើយបានគំរាមកំហែងដល់ការធ្វើដំណើរនៅសហរដ្ឋអាមេរិក ក្នុងពេលចុងសប្តាហ៍ដ៏មមាញឹកបំផុតនៃឆ្នាំនេះ។

ក្រុមហ៊ុនអាកាសចរណ៍នានាបានធ្វើការឥតសម្រាក បន្ទាប់ពីនិយតករពិភពលោក បានប្រាប់ពួកគេឱ្យដោះស្រាយបញ្ហា មុនពេលចាប់ផ្តើមជើងហោះហើរនៃយន្តហោះ A320 ឡើងវិញ។

ក្រុមហ៊ុនអាកាសចរណ៍ ដែលនិយាយថា ពួកគេបានបញ្ចប់ ឬជិតបញ្ចប់ការធ្វើបច្ចុប្បន្នភាពកម្មវិធីសូហ្វវែររបស់យន្តហោះទាំងអស់កាលពីថ្ងៃសៅរ៍ រួមមាន ក្រុមហ៊ុនអាកាសចរណ៍អាមេរិក American Airlines ក្រុមហ៊ុន United Airlines ក្រុមហ៊ុន Air India រួមទាំងស្ថាប័នជាច្រើនទៀត។

កិច្ចប្រឹងប្រែងឥតសម្រាកដោយក្រុមហ៊ុនអាកាសចរណ៍ទាំងនេះ ហាក់ដូចជាដើម្បីទប់ស្កាត់សេណារីយ៉ូដ៏អាក្រក់បំផុត និងដើម្បីបន្ថយការពន្យារពេលជើងហោះហើរនៅអាស៊ី និងអឺរ៉ុប។

នាយកប្រតិបត្តិក្រុមហ៊ុន Airbus លោក Guillaume Faury បានសូមអភ័យទោសដល់ក្រុមហ៊ុនអាកាសចរណ៍ប៉ះពាល់ទាំងឡាយ និងអ្នកដំណើរ បន្ទាប់ពីការប្រមូលយកទៅជួសជុលវិញដ៏គួរភ្ញាក់ផ្អើល នៃយន្តហោះចំនួនយ៉ាងច្រើនដល់ទៅ ៦.០០០គ្រឿង ឬច្រើនជាងពាក់កណ្តាលនៃប្រភេទ A320 នៅទូទាំងពិភពលោក ដែលថ្មីៗនេះបានវ៉ាដាច់យន្តហោះ Boeing 737 ក្លាយជាគំរូចែកចាយច្រើនបំផុតក្នុងឧស្សាហកម្មផ្លូវអាកាស៕