ក្រសួងសុខាភិបាលសាធារណៈបានរាយការណ៍ថា ចំនួនអ្នកស្លាប់ដោយសារទឹកជំនន់នៅប្រទេសថៃបានកើនឡើងដល់ ១៧០នាក់ ជាការកើនឡើង ៨នាក់ពីថ្ងៃសៅរ៍ ២៩វិច្ឆិកា និង ១០២នាក់រងរបួស។

ខេត្តសុងក្លា (Songkhla) មានចំនួនអ្នកស្លាប់ខ្ពស់បំផុតគឺ ១៣១នាក់។

ហាតយ៉ៃ (Hat Yai)ដែលជាទីក្រុងធំបំផុតក្នុងខេត្ត សុងក្លា បានទទួលទឹកភ្លៀង ៣៣៥ មីលីម៉ែត្រកាលពីថ្ងៃសុក្រសប្តាហ៍មុន ដែលជាចំនួនខ្ពស់បំផុតក្នុងរយៈពេល ៣០០ឆ្នាំ ក្នុងចំណោមភ្លៀងធ្លាក់ខ្លាំងជាច្រើនថ្ងៃមកនេះ។

វិធានការសង្គ្រោះដែលរដ្ឋាភិបាលថៃបានដាក់ចេញរួមមានសំណងរហូតដល់ពីរលានបាត ឬស្មើ៦២.០០០ដុល្លារអាមេរិក សម្រាប់គ្រួសារដែលបានបាត់បង់សមាជិកគ្រួសារ។ 

ទោះជាយ៉ាងណាក៏ដោយ មានការរិះគន់ជាសាធារណៈកាន់តែខ្លាំងចំពោះការឆ្លើយតបនឹងទឹកជំនន់របស់ប្រទេសថៃ ហើយមន្ត្រីមូលដ្ឋានពីររូបត្រូវបានផ្អាកការងារដោយសារតែការបរាជ័យរបស់ពួកគេ។

លោកនាយករដ្ឋមន្ត្រីថៃ Anutin Charnvirakul បានប្រាប់ក្រុមអ្នកសារព័ត៌មានកាលពីថ្ងៃសៅរ៍ថា លោកទទួលស្គាល់ពីចំណុចខ្វះខាតរបស់រដ្ឋាភិបាលក្នុងការគ្រប់គ្រងទឹកជំនន់ ហើយបាននិយាយថា នៅពេលលោកបានចុះទៅត្រួតពិនិត្យតំបន់រងផលប៉ះពាល់ លោកបានសូមអភ័យទោសដល់ប្រជាជន ដែលរដ្ឋាភិបាលមិនអាចថែរក្សា និងការពារពួកគេបាន។

រដូវវស្សាប្រចាំឆ្នាំ ជាធម្មតាចន្លោះខែមិថុនា និងខែកញ្ញា ជារឿយៗនាំមកនូវភ្លៀងធ្លាក់ខ្លាំង បង្កឱ្យមានបំណាក់ដី និងទឹកជំនន់ដ៏គំហុក៕