នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអាទិត្យ (៣០ វិច្ឆិកា) បានស្នើសុំការលើកលែងទោសពីប្រធានាធិបតី នៅក្នុងសវនាការជំនុំជម្រះក្តីពុករលួយដែលកើតមានតាំងតែពីឆ្នាំ២០១៩ មករបស់លោក ដោយអះអាងថា ដំណើរការព្រហ្មទណ្ឌនេះកំពុងរារាំងសមត្ថភាពរបស់លោកក្នុងការគ្រប់គ្រង ហើយការលើកលែងទោស នឹងជារឿងល្អសម្រាប់អ៊ីស្រាអែល។

លោក Netanyahu ដែលជានាយករដ្ឋមន្ត្រីកាន់តំណែងយូរបំផុតរបស់ប្រទេសនេះ បានបដិសេធនូវរាល់ការចោទប្រកាន់ទាំងឡាយពីបទស៊ីសំណូក ក្លែងបន្លំ និងរំលោភលើសេចក្តីទុកចិត្ត។ ក្រុមមេធាវីរបស់លោក បាននិយាយក្នុងលិខិតមួយផ្ញើទៅកាន់ការិយាល័យប្រធានាធិបតីថា លោកនាយករដ្ឋមន្ត្រីនៅតែជឿជាក់ថា ដំណើរការផ្លូវច្បាប់នេះ នៅទីបំផុត នឹងនាំឱ្យមានការលើកលែងទោសទាំងស្រុង។

ក្នុងសេចក្តីថ្លែងការណ៍ជាវីដេអូខ្លីមួយ លោក Netanyahu បាននិយាយថា៖ មេធាវីរបស់លោក បានផ្ញើសំណើសុំការលើកលែងទោសទៅកាន់ប្រធានាធិបតីអ៊ីស្រាអែលរួចហើយ ហើយលោករំពឹងថា អ្នកដែលចង់ឱ្យប្រទេសជាតិជួបតែរឿងល្អ នឹងគាំទ្រជំហាននេះ។

គួរឱ្យដឹងថា ការលើកលែងទោសនៅអ៊ីស្រាអែល ជាធម្មតាត្រូវបានផ្តល់ឱ្យ លុះត្រាតែដំណើរការផ្លូវច្បាប់បញ្ចប់ ហើយជនជាប់ចោទត្រូវកាត់ទោស។ ការិយាល័យរបស់ប្រធានាធិបតីអ៊ីស្រាអែល Isaac Herzog បានហៅសំណើនេះថា "មិនធម្មតា" ជាមួយនឹង "ផលវិបាកសំខាន់ៗ" ហើយថា ប្រធានាធិបតី "នឹងពិចារណាលើសំណើនេះ ប្រកបដោយការទទួលខុសត្រូវ និងហ្មត់ចត់បំផុត"។

នៅខែវិច្ឆិកា ប្រធានាធិបតីអាមេរិក Donald Trump ក៏បានផ្ញើលិខិតមួយទៅលោក Herzog ផងដែរ ដោយជំរុញឱ្យលោកពិចារណាផ្តល់ការលើកលែងទោសដល់នាយករដ្ឋមន្ត្រី ដោយនិយាយថា ករណីប្រឆាំងលោក Netanyahu គឺជាការចោទប្រកាន់ក្រោមហេតុផលនយោបាយ និងមិនយុត្តិធម៌នោះទេ៕