នាវាចម្បាំងអាមេរិកជាង ១០ គ្រឿង រួមទាំងនាវាផ្ទុកយន្តហោះធំជាងគេរបស់ប្រទេសនេះ គឺ USS Gerald R. Ford កំពុងធ្វើដំណើរទៅកាន់តំបន់ការ៉ាអ៊ីប ស្របពេលមានភាពតានតឹងកាន់តែខ្លាំងរវាងលោកប្រធានាធិបតី Trump និងប្រទេសវ៉េណេស៊ុយអេឡា។   

សារព័ត៌មាន the Conversation បានរាយការណ៍ សរុបកងទ័ព ប្រមាណ១៥.០០០នាក់ រួមទាំងកងម៉ារីន នៅលើនាវា និងកងកម្លាំងប្រហែល៥.០០០នាក់ នៅមូលដ្ឋាននានាក្នុងតំបន់ Puerto Rico ។ 

អង្គភាពបេសកកម្មកងម៉ារីនដែលមានសមត្ថភាពវាយប្រហារទាំងនៅដីគោក និងក្នុងទឹក ក៏ត្រូវបានដាក់ពង្រាយផងដែរ ជាផ្នែកមួយនៃកិច្ចខិតខំប្រឹងប្រែងដើម្បីទប់ស្កាត់លំហូរគ្រឿងញៀនចូលទៅក្នុងសហរដ្ឋអាមេរិកពីប្រទេសសង្គមនិយមនេះ។    

លោក John Phelan ប្រមុខអង្គភាពកងទ័ពជើងទឹកអាមេរិកបានប្រាប់សារព័ត៌មាន Fox News កាលពីយប់ថ្ងៃសៅរ៍ថា ការងាររបស់យោធាគឺការពារមាតុភូមិ។ នោះជាអ្វីដែលពួកលោកកំពុងធ្វើ ហើយកំពុងប្រើប្រាស់ទ្រព្យសម្បត្តិដ៏ល្អបំផុតរបស់ពួកលោកដើម្បីការពារមាតុភូមិ។

លោកបាននិយាយថា គ្រឿងញៀនសម្លាប់ជនជាតិអាមេរិកច្រើនជាងអ្វីដែលពួកលោកធ្លាប់បានបាត់បង់ក្នុងសង្គ្រាម។ដូច្នេះលោកគិតថានៅទីបញ្ចប់ ប្រធានាធិបតី បានកំណត់រឿងនេះយ៉ាងត្រឹមត្រូវថាជាការវាយប្រហារលើប្រទេស ដែលគួរតែវាយប្រហារ។

ប្រទេសវ៉េណេស៊ុយអេឡា បានចោទប្រកាន់ប្រធានាធិបតីអាមេរិកលោក Donald Trump ថាបានបង្កើត "ការគំរាមកំហែងអាណានិគមនិយម" បន្ទាប់ពីលោកបាននិយាយថា ដែនអាកាសជុំវិញប្រទេស គួរតែត្រូវបានពិចារណាបិទ៕