ឯកអគ្គរដ្ឋទូតចិនប្រចាំប្រទេសជប៉ុន លោក Wu Jianghao កាលពីថ្ងៃអាទិត្យបានជំរុញនាយករដ្ឋមន្ត្រីជប៉ុន លោកស្រី Sanae Takaichi ឱ្យដកការអត្ថាធិប្បាយខុសឆ្គងរបស់លោកស្រីភ្លាមៗទាក់ទងនឹងតំបន់តៃវ៉ាន់របស់ចិន និងចាត់វិធានការជាក់ស្តែងដើម្បីកែតម្រូវកំហុសឆ្គងទាំងនោះ។ 

លោក Wu បានអំពាវនាវបែបនេះក្នុងអត្ថបទមួយដែលមានចំណងជើងថា "គាំទ្រយ៉ាងម៉ឺងម៉ាត់នូវគោលការណ៍ចិនតែមួយ និងការពារសណ្តាប់ធ្នាប់អន្តរជាតិក្រោយសង្គ្រាម" ដែលត្រូវបានចេញផ្សាយក្នុងកាសែត The People's Daily។

ដោយលើកឡើងពីឯកសារអន្តរជាតិជាច្រើនដូចជា ឯកសារចុះចាញ់សង្គ្រាមរបស់ជប៉ុនក្នុងឆ្នាំ ១៩៤៥ និងសេចក្តីថ្លែងការណ៍រួមចិន-ជប៉ុនឆ្នាំ ១៩៧២ លោក Wu បានរិះគន់លោកស្រី Takaichi ចំពោះការធ្វើឱ្យខូចច្បាប់អន្តរជាតិយ៉ាងធ្ងន់ធ្ងរ បទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ សណ្តាប់ធ្នាប់អន្តរជាតិក្រោយសង្គ្រាមលោកលើកទី ២ និងបំផ្លាញមូលដ្ឋានគ្រឹះនយោបាយនៃទំនាក់ទំនងចិន-ជប៉ុន។

លោក Wu ក៏បានកត់សម្គាល់ផងដែរថា ពាក្យសម្ដីមិនច្បាស់លាស់ និងល្បិចកលណាមួយគឺជាការបញ្ឆោតខ្លួនឯង ការប៉ុនប៉ងគេចវេះពីការទទួលខុសត្រូវនឹងមិនដែលទទួលបានជោគជ័យឡើយ ហើយសកម្មភាពណាមួយដែលធ្វើឱ្យកំហុសកាន់តែធ្ងន់ធ្ងរឡើងនឹងនាំឱ្យមានផលវិបាកធ្ងន់ធ្ងរជាងនេះទៅទៀត។ គួររម្លឹកថា ជម្លោះការទូតរវាងចិននិងជប៉ុន នៅតែក្ដៅខ្លាំង ចាប់តាំងពីលោកស្រីនាយករដ្ឋមន្ត្រីជប៉ុន Sanae Takaichi ប្រាប់សភាកាលពីថ្ងៃទី៧វិច្ឆិកា ២០២៥ ថា ការវាយក្រសោបរបស់ចិនលើកោះស្វ័យគ្រប់គ្រងតៃវ៉ាន់ អាចបង្កឱ្យមានការឆ្លើយតបខាងយោធាពីទីក្រុងតូក្យូ៕