ទិន្នន័យពីទីភ្នាក់ងារទេសចរណ៍ និងក្រុមហ៊ុនអាកាសចរណ៍ចិន បានបង្ហាញថា ការធ្វើដំណើរតាមផ្លូវអាកាស និងទេសចរណ៍ពីប្រទេសចិន ទៅកាន់ប្រទេសជប៉ុន បានធ្លាក់ចុះគួរឱ្យកត់សម្គាល់ក្នុងខែធ្នូនេះ ចាប់តាំងពីទីក្រុងប៉េកាំង ចេញសេចក្តីណែនាំធ្វើដំណើរ ដោយព្រមានពលរដ្ឋចិន ពីហានិភ័យនៃការទៅប្រទេសជប៉ុន ស្របពេលភាពតានតឹងការទូតមិនទាន់ថយចុះ ជុំវិញបញ្ហាកោះតៃវ៉ាន់ របស់ចិន។

ប្រភពនៅក្នុងឧស្សាហកម្មចិន បាននិយាយថា បច្ចុប្បន្ននេះ ទីផ្សារទេសចរណ៍សម្រាប់ការធ្វើដំណើរកម្សាន្តក្នុងថ្ងៃបុណ្យឆ្លងឆ្នាំថ្មីទៅជប៉ុន មិនមានសញ្ញាប្រសើរឡើងទេ។ ប្រភពបន្តថា បើទោះបីជាទំនាក់ទំនងទ្វេភាគីប្រសើរឡើងវិញនៅដើមឆ្នាំក្រោយក៏ដោយ ក៏អ្នកទេសចរចិនភាគច្រើន ប្រហែលជាបង្វែរដំណើរកម្សាន្តទៅកាន់គោលដៅផ្សេងទៀត។

ទិន្នន័យបង្ហាញថា ចាប់ពីថ្ងៃទី២៤ ខែវិច្ឆិកា ដល់ថ្ងៃទី៣១ ខែធ្នូ ឆ្នាំ២០២៥នេះ ចំនួនជើងហោះហើរដែលត្រូវលុបចោល ពីចិនទៅកាន់ជប៉ុន បានកើនឡើងប្រហែល ៥៦% បើធៀបនឹងរយៈពេលដូចគ្នាកាលពីមួយខែមុននោះ។ ការកក់ទុកដោយភ្ញៀវទេសចរចិន សម្រាប់ខែធ្នូ និងរយៈពេលលើសពីនេះ គឺទាបជាងការរំពឹងទុកខ្លាំង នេះបើតាមស្ថិតិពីប្រភពឧស្សាហកម្មអាកាសចរណ៍។

ប្រព័ន្ធផ្សព្វផ្សាយ NHK របស់ជប៉ុន និយាយថា ប្រតិបត្តិករនៃអាកាសយានដ្ឋាន New Chitose នៅភាគខាងជើងកោះហុកកៃដូ របស់ជប៉ុន បានឱ្យដឹងថា ជើងហោះហើរមកពីចិន ត្រូវបានលុបចោល ឬកាត់បន្ថយ ដែលមានន័យថា ភ្ញៀវទេសចរចិនប្រមាណពី ៣ម៉ឺន ទៅ ៤ម៉ឺននាក់ នឹងមិនអាចធ្វើដំណើរទៅជប៉ុនបាន រហូតដល់ខែមីនា ឆ្នាំក្រោយ៕