ជនអន្តោប្រវេសន៍រាប់សិបនាក់នៅតែជាប់ខ្លួននៅព្រំដែនប្រេទេសឈីលីជាមួយប្រទេសប៉េរូកាលពីថ្ងៃអាទិត្យ ទី៣០ ខែវិច្ឆិកា ជាការជាប់គាំងខណៈមានការគំរាមកំហែងនិរទេសរបស់បេក្ខជនប្រធានាធិបតីស្តាំនិយម និងព្រំដែនមានយោធារបស់ប្រទេសប៉េរូ។

ប្រទេសប៉េរូ បានដាក់ពង្រាយទាហាន និងនគរបាលដើម្បីការពារព្រំដែនភាគខាងត្បូងរបស់ខ្លួន ដោយរារាំងការឆ្លងកាត់សម្រាប់ជនអន្តោប្រវេសន៍ដែលព្យាយាមចាកចេញពីប្រទេសឈីលី បន្ទាប់ពីបេក្ខជនឈានមុខប្រធានាធិបតី លោក Jose Antonio Kast បានសន្យាថានឹងបណ្តេញជនអន្តោប្រវេសន៍គ្មានឯកសារចេញ នៅពេលចូលកាន់តំណែង។

យោងតាមនគរបាលប៉េរូបានឲ្យដឹងថា ការព្រមាននេះបានបង្កឱ្យមានការចាកចេញរបស់ជនបរទេសទៅកាន់ច្រកព្រំដែន Chacalluta ក្នុងតំបន់Arica។ ប៉ុន្តែបច្ចុប្បន្ននេះ មនុស្សជាច្រើនបានមើលឃើញថាខ្លួនឯងជាប់គាំង មិនអាចទៅមុខ ឬថយក្រោយបាន។

អ្នកស្រី Cecilia ជាជនអន្តោប្រវេសន៍ជនជាតិអេក្វាឌ័រម្នាក់ដែលកំពុងព្យាយាមត្រឡប់ទៅស្រុកកំណើតវិញជាមួយកូនៗរបស់នាងបាននិយាយថា «ខ្ញុំនៅទីនេះរយៈពេលជិតប្រាំថ្ងៃហើយ ហើយខ្ញុំអស់លុយហើយនៅពេលនេះ»។

លោក Kast ជាបេក្ខជនដែលនឹងយកជ័យជម្នះក្នុងការបោះឆ្នោតជុំទីពីរនៅខែក្រោយទល់នឹង លោកJeannette Jara ក្រុមឆ្វេងនិយម បានធ្វើឱ្យគោលនយោបាយអន្តោប្រវេសន៍ដ៏តឹងរ៉ឹង ក្លាយជាចំណុចកណ្តាលនៃយុទ្ធនាការរបស់លោក។