មន្ត្រីប៉ាឡេស្ទីនម្នាក់បានប្រាប់សារព័ត៌មាន AFP ថា អេហ្ស៊ីបកំពុងបណ្តុះបណ្តាលមន្ត្រីនគរបាលប៉ាឡេ    ស្ទីនរាប់រយនាក់ ដោយមានបំណងចង់ធ្វើសមាហរណកម្មពួកគេទៅក្នុងកម្លាំងសន្តិសុខ ក្រោយសង្គ្រាមនៅតំបន់ហ្កាហ្សា។

រដ្ឋមន្ត្រីការបរទេសអេហ្ស៊ីប លោក Badr Abdelatty បានប្រកាសពីផែនការបណ្តុះបណ្តាលមន្ត្រីចំនួន ៥.០០០ នាក់ សម្រាប់តំបន់ហ្កាហ្សា ក្នុងអំឡុងពេលចរចាជាមួយនាយករដ្ឋមន្ត្រីប៉ាឡេស្ទីន លោក Mohammad Mustafa កាលពីខែសីហា។

មន្ត្រីប៉ាឡេស្ទីនបានប្រាប់កាសែត AFP ក្នុងលក្ខខណ្ឌមិនបញ្ចេញឈ្មោះថា ក្រុមដំបូងមានមន្ត្រីជាង ៥០០ នាក់ ត្រូវបានបណ្តុះបណ្តាលនៅទីក្រុងគែរ កាលពីខែមីនា ហើយចាប់តាំងពីខែកញ្ញាមក វគ្គសិក្សារយៈពេលពីរខែ បានចាប់ផ្តើមឡើងវិញ ដើម្បីទទួលមនុស្សរាប់រយនាក់បន្ថែមទៀត។ 

លោកបាននិយាយថា សមាជិកទាំងអស់នៃកម្លាំងនឹងមកពីតំបន់ហ្កាហ្សា និងទទួលបានប្រាក់បៀវត្សរ៍ពីអាជ្ញាធរប៉ាឡេស្ទីន ដែលមានមូលដ្ឋាននៅទីក្រុងរ៉ាម៉ាឡា (Ramallah) ក្នុងតំបន់វេសបែង(West Bank)។

មន្ត្រីនគរបាលប៉ាឡេស្ទីនអាយុ ២៦ឆ្នាំ ម្នាក់ បាននិយាយថា៖«ខ្ញុំពិតជារីករាយណាស់ជាមួយនឹងការ        បណ្តុះបណ្តាលនេះ។ យើងចង់បានការបញ្ចប់ជាអចិន្ត្រៃយ៍នៃសង្គ្រាម និងការឈ្លានពាន ហើយយើងចង់បម្រើមាតុភូមិរបស់យើង និងប្រជាពលរដ្ឋរបស់យើង»៕