រដ្ឋាភិបាលទួរគីបានថ្កោលទោសការវាយប្រហារដោយយានដ្រូនរបស់អ៊ុយក្រែនទៅលើនាវាដឹកប្រេងពីរគ្រឿងរបស់«កងនាវាស្រមោលរុស្ស៊ី » នៅសមុទ្រខ្មៅ។

អ្នកនាំពាក្យក្រសួងការបរទេសលោក Oncu Keceli បាននិយាយថា ការវាយប្រហារលើនាវា Kairos និង Virat បានកើតឡើង នៅក្នុងតំបន់សេដ្ឋកិច្ចផ្តាច់មុខរបស់ប្រទេសទួរគី ហើយ «បានបង្កហានិភ័យដ៏ធ្ងន់ធ្ងរដល់សុវត្ថិភាពនាវាចរណ៍ ជីវិត ទ្រព្យសម្បត្តិ និងបរិស្ថាននៅក្នុងតំបន់»។

នៅក្នុងការបង្ហោះនៅលើប្រព័ន្ធផ្សព្វផ្សាយសង្គមកាលពីយប់ថ្ងៃសៅរ៍ លោក Keceli បានបន្ថែមថា ប្រទេសទួរគី កំពុងធ្វើការចរចាជាមួយ «ភាគីពាក់ព័ន្ធ» ដើម្បីទប់ស្កាត់ការរីករាលដាលនៃសង្គ្រាមនៅអ៊ុយក្រែន នៅទូទាំងសមុទ្រខ្មៅ និងដើម្បីការពារផលប្រយោជន៍សេដ្ឋកិច្ចរបស់ប្រទេសនេះ។

អ៊ុយក្រែនបាននិយាយថា ខ្លួនបានប្រើដ្រូនរបស់កងទ័ពជើងទឹក ដើម្បីវាយប្រហារនាវាដឹកប្រេងជាបន្តបន្ទាប់នៅឆ្នេរសមុទ្រខ្មៅរបស់ទួរគី កាលពីយប់ថ្ងៃសុក្រ។ សមាជិកនាវិកនៅលើនាវាទាំងពីរ ត្រូវបានរាយការណ៍ថា មានសុវត្ថិភាព។

ទិន្នន័យរបស់អង្គការ Open Sanctions ដែលតាមដានមនុស្ស ឬអង្គការដែលពាក់ព័ន្ធនឹងការគេចវេសទណ្ឌកម្ម បានពិពណ៌នាអំពីនាវាទាំងនោះថា ជាផ្នែកមួយនៃកងនាវាដែលត្រូវបានប្រើប្រាស់ ដើម្បីគេចវេសទណ្ឌកម្មដែលដាក់លើប្រទេសរុស្ស៊ី បន្ទាប់ពីការឈ្លានពានអ៊ុយក្រែន នៅឆ្នាំ ២០២២៕