លោកឧត្តមនាវីឯក Cavo Dragone ប្រធានគណៈកម្មាធិការយោធារបស់អង្គការណាតូ (NATO) បានប្រាប់សារព័ត៌មាន Financial Times (FT)ថា សម្ព័ន្ធភាពអាត្លង់ទិកខាងជើង កំពុងស្វែងយល់ពីលទ្ធភាពនៃការវាយប្រហារជាមុន ដើម្បីឆ្លើយតបទៅនឹងសកម្មភាពឈ្លានពានរបស់រុស្ស៊ី ប៉ុន្តែឧបសគ្គផ្នែកច្បាប់ កំពុងធ្វើឲ្យការសម្រេចចិត្តណាមួយមានភាពស្មុកស្មាញ។

យោងតាមលោក Dragone បានឲ្យដឹងថា សម្ព័ន្ធភាពយោធានេះ កំពុងពិចារណាលើវិធីសាស្រ្តបុរេសកម្ម ដែលអាចធ្វើសកម្មភាពជាមុន ជាជាងប្រតិកម្មតែមួយមុខនោះ។ លោកបានបន្ថែមថា អង្គការណាតូអាចកំណត់ការវាយប្រហារបែបនេះ ជាវិធានការការពារ។

ទោះជាយ៉ាងណាក៏ដោយ លោកឧត្តមនាវីឯកបានទទួលស្គាល់ថា វិធីសាស្រ្តនេះ គឺលើសពីការអនុវត្តជាប្រពៃណីរបស់អង្គការណាតូ។ លោកបានពន្យល់ថា បញ្ហាប្រឈមពាក់ព័ន្ធនឹងក្របខ័ណ្ឌច្បាប់ និងសំណួរថាតើអង្គភាពណានៅក្នុងសម្ព័ន្ធភាពយោធា នឹងអនុវត្តសកម្មភាពបែបនេះ។

នាពេលថ្មីៗនេះ ឯកអគ្គរដ្ឋទូតរុស្ស៊ីប្រចាំប្រទេសបែលហ្ស៊ិក លោក Denis Gonchar បាននិយាយថា៖      «ដោយការបំភិតបំភ័យប្រជាជនរបស់ខ្លួនជាមួយនឹងផែនការដែលគ្រាន់តែគិតរបស់វិមានក្រឹមឡាំង ដើម្បីវាយប្រហារប្រទេសសម្ព័ន្ធមិត្តនោះ អង្គការណាតូបានចាប់ផ្តើម «រៀបចំសម្រាប់សង្គ្រាមទ្រង់ទ្រាយធំមួយជាមួយរុស្ស៊ី»៕