ប្រធានាធិបតីស៊ីរី លោក Ahmad Al-Sharaa បានចូលរួមពិធីអបអរសាទរមួយ នៅទីក្រុងអាឡេប៉ូ ដើម្បីរំលឹកខួបលើកទី១ នៃការរំដោះទីក្រុងពីរបបរបស់លោក បាសា អាល់អាសាដ (Bashar al-Assad)។

ទីក្រុងអាឡេប៉ូ គឺជាទីក្រុងដំបូងគេ ដែលបានងើបឡើងប្រឆាំងនឹងរបបនេះ ក្នុងឆ្នាំ ២០១១។ ទីក្រុងផ្សេងទៀត ក៏បានធ្វើដូចគ្នាជាបន្តបន្ទាប់។

សម្ព័ន្ធភាពដឹកនាំដោយលោក Al-Sharaa បានចូលទៅក្នុងទីក្រុងអាឡេប៉ូ នៅថ្ងៃទី ២៩ ខែវិច្ឆិកា ឆ្នាំ ២០២៤ ហើយបានគ្រប់គ្រងទីក្រុងទី២របស់ប្រទេសស៊ីរីយ៉ាងឆាប់រហ័ស។

ទីភ្នាក់ងារសារព័ត៌មានអារ៉ាប់ស៊ីរី បានរាយការណ៍ថា លោក Al-Sharaa បាននិយាយថា ការរំដោះទីក្រុងនេះ គឺការចាប់ផ្តើមនៃការរំដោះសាធារណរដ្ឋអារ៉ាប់ស៊ីរីទាំងមូល។

លោកបានប្រាប់ការជួបជុំអបអរសាទរកាលពីថ្ងៃសៅរ៍ថា៖«ប្រជាជនរបស់យើង បានធ្វើការលះបង់យ៉ាងធំធេង រហូតដល់យើងសម្រេចបាននូវសមិទ្ធផលដែលយើងប្រារព្ធធ្វើឡើង នៅថ្ងៃនេះ»។

លោក Al-Sharaa បានប្រាប់មនុស្សរាប់រយនាក់ដែលបានប្រមូលផ្តុំគ្នានៅខាងក្រៅវិមានដ៏ល្បីល្បាញរបស់ទីក្រុងនេះថា៖«ទីក្រុងអាឡេប៉ូ បានកើតជាថ្មី ហើយជាមួយនឹងការកើតជាថ្មីនេះ ប្រទេសស៊ីរីទាំងមូល ក៏បានកើតជាថ្មីដែរ។ នៅក្នុងពេលវេលាដូចនេះ ប្រវត្តិសាស្ត្រថ្មីសម្រាប់ប្រទេសស៊ីរីទាំងមូល កំពុងត្រូវបានសរសេរឡើង តាមរយៈទីក្រុងអាឡេប៉ូ និងបន្ទាយការពារដ៏រ៉ឹងមាំឲ្យគួរឲ្យមោទនភាពរបស់ខ្លួន»៕