សម្តេចប៉ាប Leo បានលើកឡើងវិញពីការទទួចរបស់វិមានវ៉ាទីកង់លើដំណោះស្រាយរដ្ឋ ២សម្រាប់ជម្លោះអ៊ីស្រាអែល-ប៉ាឡេស្ទីន ដោយទ្រង់មានបន្ទូលថា វាគឺជាដំណោះស្រាយតែមួយគត់ដែលអាចធានាយុត្តិធម៌សម្រាប់ភាគីទាំង ២ បាន ។

សម្តេចប៉ាប Leo បានធ្វើសេចក្តីអត្ថាធិប្បាយបែបនេះ ពេលទ្រង់យាងហោះហើរចេញពីប្រទេសទួរគី ទៅកាន់ប្រទេសលីបង់កាលពីថ្ងៃអាទិត្យ សម្រាប់ជើងទី ២ និងជាជើងចុងក្រោយនៃដំណើរយាងទស្សនកិច្ចអន្តរជាតិលើកដំបូងរបស់ព្រះក្នុងនាមជាសម្តេចប៉ាប ។

នៅលើជើងហោះហើរ សម្តេចប៉ាប ត្រូវបានក្រុមអ្នកសារព័ត៌មានសួរពីកិច្ចពិភាក្សាឯកជនរបស់ព្រះអង្គជាមួយប្រធានាធិបតីទួរគីលោក Recep Tayyip ពេលទ្រង់ធ្វើដំណើរទៅដល់ទីក្រុងអង់ការ៉ា ហើយនិងថាតើទ្រង់មានបានពិភាក្សាពីសង្រ្គាមនៅហ្កាហ្សា និងអ៊ុយក្រែនដែរឬទេ ។

សម្តេចប៉ាប បញ្ជាក់ថា ទ្រង់ពិតជាបានពិភាក្សាលើបញ្ហាទាំងនេះ ហើយទួរគីដើរតួយ៉ាងសំខាន់ ក្នុងការបញ្ចប់ជម្លោះទាំង ២ ។

ពាក់ព័ន្ធនឹងបញ្ហាហ្កាហ្សា ព្រះអង្គបានលើកឡើងវិញពីគោលជំហរយូរអង្វែងរបស់វិមានវ៉ាទីកង់ គាំទ្រដំណោះស្រាយរដ្ឋ ២សម្រាប់អ៊ីស្រាអែល និងប៉ាឡេស្ទីន ។

ព្រះអង្គមានបន្ទូលថា យើងដឹងថានៅពេលនេះ អ៊ីស្រាអែលពុំព្រមទទួលយកដំណោះស្រាយមួយនេះឡើយ ប៉ុន្តែយើងយល់ឃើញថា មានតែមធ្យោបាយមួយគត់ដែលអាចផ្តល់ដំណោះស្រាយចំពោះជម្លោះដែលពួកគេកំពុងរស់នៅជាមួយបាន ។ យើងជាមិត្តជាមួយអ៊ីស្រាអែល ហើយយើងព្យាយាមជាមួយភាគីទាំង ២ ក្លាយជាសំឡេងសម្របសម្រួលដែលអាចជួយពួកគេខិតទៅរកដំណោះស្រាយប្រកបដោយយុត្តិធម៌សម្រាប់ភាគីទាំងអស់ ៕