ប្រធានសភាវេណេស៊ុយអេឡាលោក Jorge Rodriguez និយាយកាលពីថ្ងៃអាទិត្យ សភារបស់លោកនឹងបង្កើតគណៈកម្មការពិសេស ដើម្បីស៊ើបអង្កេតការវាយប្រហារស្លាប់មនុស្សរបស់ប្រធានាធិបតីសហរដ្ឋអាមេរិកលោក Donald Trump លើទូកសង្ស័យជួញដូរគ្រឿងញៀន នៅជិតតំបន់ឆ្នេរវេណេស៊ុយអេឡា ហើយនិងនៅភាគខាងកើតមហាសមុទ្រប៉ាស៊ីហ្វិក ។

ថ្លែងលើកញ្ចក់ទូរទស្សន៍រដ្ឋ លោក Rodriguezនិយាយថា ការស៊ើបអង្កេតនឹងពិនិត្យមើលសេចក្តីរាយការណ៍របស់កាសែត Washington Post កាលពីថ្ងៃសុក្រសប្តាហ៍មុនដែលបានរាយការណ៍ថា រដ្ឋមន្រ្តីការពារជាតិសហរដ្ឋអាមេរិកលោក Pete Hegseth បញ្ជាឲ្យសម្លាប់មនុស្សទាំងអស់នៅលើទូកមួយគ្រឿងក្នុងចំណោមទូកជាច្រើនគ្រឿងទៀត អំឡុងការវាយប្រហារកាលពីខែកញ្ញា ។ ការវាយប្រហារទី ២ ត្រូវបានធ្វើឡើង ដើម្បីសម្លាប់មនុស្សរស់រាន ២នាក់ ។

លោក Rodriguez និយាយប្រាប់សន្និសីទសារព័ត៌មានថា ពួកយើងនឹងបើកការស៊ើបអង្កេតស៊ីជម្រៅ និងប្រិតប្រៀង ហើយការិយាល័យរដ្ឋអាជ្ញាវេណេស៊ុយអេឡា នឹងចូលរួមការស៊ើបអង្កេតនេះ ។

អស់រយៈពេលជាច្រើនខែមកហើយដែលសហរដ្ឋអាមេរិក បានបើកយុទ្ធនាការវាយប្រហារស្លាប់មនុស្សលើទូកសង្ស័យជួញដូរគ្រឿងញៀននៅក្នុងតំបន់ ។

លោក Maduro និងរដ្ឋាភិបាលរបស់លោក បានច្រានចោលការជាប់ពាក់ព័ន្ធណាមួយនឹងឧក្រិដ្ឋកម្មគ្រឿងញៀន ហើយនិងបានចោទប្រកាន់សហរដ្ឋអាមេរិកថា ព្យាយាមផ្លាស់ប្តូររបប ក្នុងគោលបំណងគ្រប់គ្រងទុនបម្រុងប្រេងដ៏ធំរបស់វេណេស៊ុយអេឡា ៕