ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី៣០ ខែវិច្ឆិកា) បានបញ្ជាក់ថា លោកបាននិយាយកាលពីពេលថ្មីៗនេះជាមួយមេដឹកនាំវ៉េណេស៊ុយអេឡា លោក Nicolas Maduro ស្របពេលមានភាពតានតឹងកាន់តែខ្លាំងឡើង រវាងប្រទេសទាំង២ ខណៈដែលទីក្រុងការ៉ាកាស (Caracas) បានថ្កោលទោសនូវអ្វីដែលហៅថា ការត្រៀមលក្ខណៈរបស់សហរដ្ឋអាមេរិក សម្រាប់ការវាយប្រហារមួយ។

សហរដ្ឋអាមេរិកកំពុងដាក់សម្ពាធលើវ៉េណេស៊ុយយអេឡា ដោយបានបង្កើនយោធាដ៏ធំ នៅតំបន់ការ៉ាអ៊ីប ចាត់បញ្ចូលក្រុមជួញដូរគ្រឿងញៀនដែលត្រូវបានចោទប្រកាន់ថា គ្រប់គ្រងដោយលោក Maduro ជាក្រុមភេរវករ និងចេញនូវការព្រមានបែបគំរាមកំហែងពីលោក Trump ដែលថា ដែនអាកាសវ៉េណេស៊ុយអេឡាត្រូវបាន «បិទ»។

ទីក្រុងវ៉ាស៊ីនតោនផ្ដល់ហេតុផលថា ការដាក់ពង្រាយយោធាដែលបានចាប់ផ្តើមឡើង កាលពីខែកញ្ញា មានគោលបំណងទប់ស្កាត់ការជួញដូរគ្រឿងញៀន នៅក្នុងតំបន់នេះ ប៉ុន្តែទីក្រុងការ៉ាកាស បានទទូចថា ការផ្លាស់ប្តូររបបដឹកនាំប្រទេស គឺជាគោលដៅចុងក្រោយ។

យ៉ាងណាក្ដី កាលពីថ្ងៃអាទិត្យ នៅលើយន្តហោះ Air Force One លោក Trump បានប្រាប់អ្នកសារព័ត៌មានថា៖ «ខ្ញុំនឹងមិននិយាយថា វាគឺជារឿងល្អ ឬអាក្រក់នោះឡើយ។ វាគឺជាការជជែកតាមទូរសព្ទ»។

សារព័ត៌មាន New York Times បានរាយការណ៍កាលពីថ្ងៃសុក្រសប្ដាហ៍កន្លងទៅថា លោក Trump និងលោក Maduro បានពិភាក្សាគ្នា អំពីលទ្ធភាពដែលអាចមានកិច្ចប្រជុំ ខណៈដែលសារព័ត៌មាន The Wall Street Journal បានឲ្យដឹងកាលពីថ្ងៃសៅរ៍ថា ការសន្ទនានោះក៏រួមបញ្ចូលលក្ខខណ្ឌលើកលែងទោសផងដែរ ប្រសិនបើលោក Maduro ត្រូវចុះចេញពីតំណែង៕