ស្ថាប័នស្រាវជ្រាវ នៅថ្ងៃចន្ទ (ទី១ ខែធ្នូ) បានឲ្យដឹងថា ការលក់របស់ក្រុមហ៊ុនផលិតអាវុធធំជាងគេទាំង ១០០ របស់ពិភពលោក បានឈានដល់កម្រិតខ្ពស់បំផុត ៦៧៨ពាន់លានដុល្លារអាមេរិក ក្នុងឆ្នាំ២០២៤ ខណៈដែលសង្រ្គាម នៅប្រទេសអ៊ុយក្រែន និងតំបន់ហ្កាហ្សា បានធ្វើឲ្យមានតម្រូវការកាន់តែខ្ពស់ឡើងៗ ប៉ុន្តែបញ្ហាផលិតកម្ម បានរំខានដល់ដំណើរការដឹកជញ្ជូន។

យោងតាមរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) បានឲ្យដឹងថា តួលេខនេះ គឺខ្ពស់ជាងឆ្នាំមុននោះ ៥,៩ភាគរយ ហើយក្នុងរយៈពេលពីឆ្នាំ២០១៥ ដល់ឆ្នាំ២០២៤ ប្រាក់ចំណូល សម្រាប់ក្រុមហ៊ុនផលិតអាវុធធំជាងគេទាំង ១០០ បានកើនឡើង ២៦ភាគរយ។

នៅក្នុងសេចក្តីថ្លែងការណ៍មួយ លោក Lorenzo Scarazzato អ្នកស្រាវជ្រាវនៃកម្មវិធីចំណាយ និងផលិតអាវុធរបស់ SIPRI បាននិយាយថា៖ «ប្រាក់ចំណូលពីការលក់អាវុធសកល កាលពីឆ្នាំមុន បានឈានដល់កម្រិតខ្ពស់បំផុតមិនធ្លាប់មានដែលត្រូវបានបានកត់ត្រាដោយ SIPRI ខណៈដែលក្រុមហ៊ុនផលិតបានទទួលផលចំណេញពីតម្រូវការខ្ពស់»។

យោងតាម SIPRI បានឲ្យដឹងថា តម្រូវការពីអ៊ុយក្រែន ក៏ដូចជាពីបណ្តាប្រទេសដែលគាំទ្រតម្រូវការផ្នែកយោធានេះ និងដែលត្រូវការការបំពេញឃ្លាំងអាវុធរបស់ខ្លួន បានជួយជំរុញឲ្យមានតម្រូវការកាន់តែខ្លាំងឡើងៗ។

សហរដ្ឋអាមេរិក គឺជាទីកន្លែងរបស់ក្រុមហ៊ុនផលិតអាវុធចំនួន ៣៩ ក្នុងចំណោមក្រុមហ៊ុនផលិតអាវុធធំជាងគេទាំង ១០០ របស់ពិភពលោក ក្នុងនោះមានរួមទាំងកំពូលទាំង ៣ គឺ Lockheed Martin, RTX (អតីត Raytheon Technologies) និង Northrop Grumman។ ក្រុមហ៊ុនផលិតអាវុធរបស់សហរដ្ឋអាមេរិកទាំង ៣ នេះ បានឃើញប្រាក់ចំណូលរួមបញ្ចូលគ្នាកើនឡើង ៣,៨ភាគរយ ដោយឡើងដល់ ៣៣៤ពាន់លានដុល្លារ ក្នុងឆ្នាំ២០២៤ ដែលជិតពាក់កណ្តាលនៃចំនួនសរុបរបស់ពិភពលោក៕