ទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យាភូមិសាស្ត្រ (GISTDA) បានចេញការព្រមានមួយ នៅព្រឹកថ្ងៃចន្ទ (ទី១ ខែធ្នូ) នេះ បន្ទាប់ពីកម្មវិធី «Check Foon» របស់ស្ថាប័ន បានកត់ត្រាកម្រិតសារធាតុ PM2.5 ឬកំហាប់ភាគល្អិតនិចលដ៏គ្រោះថ្នាក់ទូទាំងប្រទេស នៅវេលាម៉ោង ៦ព្រឹក (ម៉ោងក្នុងស្រុក)។

ខេត្តចំនួន ៥ ត្រូវបានគេរកឃើញថា ស្ថិតនៅក្នុងតំបន់ពណ៌ក្រហម ដែលបង្ហាញពីការបំពុល លើសពីដែនកំណត់សុវត្ថិភាព និងបង្កហានិភ័យដល់សុខភាពផ្លូវដង្ហើម ខណៈដែលខេត្តចំនួន ៤១ ស្ថិតនៅក្នុងតំបន់ពណ៌ទឹកក្រូច ដែលគុណភាពខ្យល់ ចាប់ផ្តើមប៉ះពាល់ដល់ក្រុមមនុស្សងាយរងគ្រោះ។

នៅទីក្រុងបាងកក កម្រិតសារធាតុ PM2.5 លើសពីកម្រិតពណ៌ក្រហម នៅក្នុងតំបន់ចំនួន ៤៨។ ហើយការព្យាកររយៈពេល ៣ម៉ោង ដោយ GISTDA បង្ហាញថា កម្រិតពណ៌ក្រហម និងពណ៌ទឹកក្រូច នឹងបន្តមានពាសពេញតំបន់ជាច្រើននៅព្រឹកនេះ។

ទន្ទឹមនឹងនេះ នៅវេលាម៉ោង ៧ព្រឹក (ម៉ោងក្នុងស្រុក) មជ្ឈមណ្ឌលព័ត៌មានគុណភាពខ្យល់របស់រដ្ឋបាលក្រុងបាងកក បានរាយការណ៍ថា រាជធានីនេះបានកត់ត្រាកម្រិតសារធាតុ PM2.5 ជាមធ្យម ៤៥មីក្រូក្រាម ក្នុងមួយម៉ែត្រគូប ដែលលើសពីស្តង់ដារជាតិ ៣៧មីក្រូក្រាម ក្នុងមួយម៉ែត្រគូប៕