ក្រុមផ្តល់ជំនួយ និងក្រុមជួយសង្រ្គោះនៅឥណ្ឌូនេស៊ីប្រើប្រាស់ឧទ្ធម្ភាគចក្រ ដើម្បីចែកចាយជំនួយដល់ពលរដ្ឋដែលមិនអាចទៅដល់ដោយសារផ្លូវបិទនៅកោះភាគខាងលិចស៊ូម៉ាត្រា ជាទីដែលខេត្តចំនួន ៣ត្រូវបានបំផ្លិចបំផ្លាញដោយបំណាក់ដី និងទឹកជំនន់ ក្រោយភ្លៀងធ្លាក់ខ្លាំង ។​ យោងតាមការអះអាងរបស់ក្រុមអាជ្ញាធរ បានឲ្យដឹងថា ចំនួនមនុស្សស្លាប់ដោយសារទឹកជំនន់និងបំណាក់ដីនៅឥណ្ឌូនេស៊ី បានកើនឡើងដល់ជាង ៥០០នាក់ និងរាប់រយនាក់ផ្សេងទៀត រងរបួស ។

ឥណ្ឌូនេស៊ី ម៉ាឡេស៊ី និងថៃ ប្រឈមនឹងការខូចខាតទ្រង់ទ្រាយធំក្រោយព្យុះត្រូពិកដ៏កម្រ កកើតឡើងនៅច្រកសមុទ្រ Malacca បង្កឲ្យមានភ្លៀងធ្លាក់ខ្លាំង និងខ្យល់បក់ខ្លាំងអស់រយៈពេល ១សប្តាហ៍ ។ក្រុមមន្រ្តីនិយាយកាលពីថ្ងៃសៅរ៍ថាមាននូវសេចក្តីរាយការណ៍ថាមនុស្សនាំគ្នាលួចគ្រឿងផ្គត់ផ្គង់ពេលដែលពួកគេអស់សង្ឃឹមចំពោះការសង្រ្គោះ ។យោងតាមស្ថិតិផ្លូវការ បានឲ្យដឹងថា មនុស្សជាង ៤លាននាក់បានរងផលប៉ះពាល់ដោយសារទឹកជំនន់ ក្នុងនោះមនុស្សជិត ១,១លាននាក់ នៅភាគខាងលិចឥណ្ឌូនេស៊ីនិង​ មនុស្ស៣លាននាក់ នៅភាគខាងត្បូងប្រទេសថៃ ៕