អ្នកការទូតជាន់ខ្ពស់របស់សហភាពអឺរ៉ុប (EU) លោកស្រី Kaja Kallas នៅថ្ងៃចន្ទ (ទី១ ខែធ្នូ) នេះ បានលើកឡើងថា សប្តាហ៍នេះអាចជាដំណាក់កាលដ៏សំខាន់ ចំពោះការជំរុញឲ្យបញ្ចប់សង្រ្គាមអ៊ុយក្រែន ខណៈដែលតំណាងរបស់សហរដ្ឋអាមេរិកធ្វើដំណើរតម្រង់ទៅទីក្រុងមូស្គូ បន្ទាប់ពីមានកិច្ចពិភាក្សាជាមួយអ្នកចរចារបស់ទីក្រុងគីវ។

នៅឯកិច្ចប្រជុំរដ្ឋមន្ត្រីការពារជាតិ EU លោកស្រី Kallas បាននិយាយថា៖ «វាអាចជាសប្តាហ៍ដ៏សំខាន់មួយសម្រាប់ផ្នែកការទូត។ យើងបានឮកាលពីម្សិលមិញ (ថ្ងៃទី៣០ ខែវិច្ឆិកា) ថា កិច្ចចរចា នៅអាមេរិក មានភាពលំបាក ប៉ុន្តែទទួលបានផ្លែផ្កា។ យើងមិនទាន់ដឹងពីលទ្ធផលនៅឡើយទេ ប៉ុន្តែខ្ញុំនឹងពិភាក្សាជាមួយរដ្ឋមន្ត្រីការពារជាតិអ៊ុយក្រែន ក៏ដូចជារដ្ឋមន្ត្រីការបរទេសអ៊ុយក្រែន នៅថ្ងៃនេះ»។

លោក Steve Witkoff ដែលជាបេសកជនរបស់លោកប្រធានាធិបតី Donald Trump នឹងធ្វើដំណើរទៅរុស្ស៊ី នៅថ្ងៃចន្ទនេះ ខណៈដែលទីក្រុងវ៉ាស៊ីនតោនជំរុញឲ្យវិមានក្រឹមឡាំងបញ្ចប់សង្រ្គាម លើប្រទេសជិតខាងរបស់ខ្លួន គឺអ៊ុយក្រែន។

ដំណើរទស្សនកិច្ចរបស់លោក Witkoff ដែលត្រូវបានរំពឹងថា មានកិច្ចពិភាក្សាជាមួយប្រធានាធិបតីរុស្ស៊ីលោក Vladimir Putin នៅថ្ងៃអង្គារ កើតឡើងក្រោយការចរចារដែលមានហានិភ័យខ្ពស់ កាលពីថ្ងៃអាទិត្យ (ទី៣០ ខែវិច្ឆិកា) រវាងមន្ត្រីជាន់ខ្ពស់នៅក្នុងរដ្ឋបាលរបស់លោក Trump និងគណៈប្រតិភូអ៊ុយក្រែន នៅរដ្ឋ Florida។

លោកស្រី Kallas បានមិនឆ្លើយសំណួរមួយ ជុំវិញថា តើលោកស្រីជឿជាក់លើសហរដ្ឋអាមេរិកថា នឹងចរចានូវកិច្ចព្រមព្រៀងមួយដ៏ល្អដែរ ឬទេ។ ជំនួសមកវិញ លោកស្រីបាននិយាយថា វានឹងប្រសើរជាង ប្រសិនបើអឺរ៉ុប ដែលភាគច្រើនត្រូវបានទីក្រុងវ៉ាស៊ីនតោនដកចេញ គឺជាផ្នែកមួយនៃកិច្ចប្រឹងប្រែងការទូតដែលពាក់ព័ន្ធនឹងអ៊ុយក្រែន៕