ប្រធានាធិបតីអ៊ុយក្រែនលោក Volodymyr Zelenskiy បានជួបជាមួយប្រធានាធិបតីបារាំងលោក Emmanuel Macron នៅក្នុងទីក្រុងប៉ារីសនាថ្ងៃចន្ទនេះ ស្របពេលដែលមេដឹកនាំអ៊ុយក្រែនរូបនេះ យល់ឃើញថា រូបលោកស្ថិតក្នុងស្ថានភាពនយោបាយ និងយោធាដ៏លំបាកបំផុត ចាប់តាំងពីការវាយលុករបស់រុស្ស៊ីកាលពីឆ្នាំ ២០២២ ។

ការិយាល័យរបស់លោក Macron និយាយនៅក្នុងសេចក្តីថ្លែងការណ៍កាលពីថ្ងៃសៅរ៍ថា មេដឹកនាំទាំង ២ នឹងពិភាក្សាលើលក្ខខណ្ឌនៃសន្តិភាពដ៏ត្រឹមត្រូវ និងយូរអង្វែង បន្ទាប់កិច្ចប្រជុំនៅទីក្រុងហ្សឺណែវ ហើយនិងផែនការសន្តិភាពរបស់អាមេរិក ។

ក្រុមមន្រ្តីសហរដ្ឋអាមេរិក និងក្រុមមន្រ្តីអ៊ុយក្រែន ដែលចូលរួមកិច្ចប្រជុំនេះ ចាត់ទុកថាជាជំនួបប្រកបដោយផ្លែផ្កា ស្តីពីកិច្ចព្រមព្រៀងសន្តិភាពរុស្ស៊ី ក្នុងនោះរដ្ឋមន្រ្តីការបរទេសសហរដ្ឋអាមេរិកលោក Marco Rubio បង្ហាញសុទិដ្ឋិនិយមចំពោះវឌ្ឍភាព បើទោះបីជាមានការលំបាក ក្នុងការបញ្ចប់សង្រ្គាមអូសបន្លាយពេលជាង ៣ឆ្នាំមួយនេះក៏ដោយ ។

ខណៈពេលនោះដែរ សារព័ត៌មាន The Wall Street Journalរាយការណ៍ ដោយដកស្រង់ប្រភពថា បញ្ហានៃការធានាសន្តិសុខរបស់លោកខាងលិចសម្រាប់ទីក្រុងគីវ នៅតែមិនទាន់ដោះស្រាយបាន បន្ទាប់ពីការចរចារវាងសហរដ្ឋអាមេរិក និងអ៊ុយក្រែននៅរដ្ឋ Florida ។ 

សេចក្តីរាយការណ៍បន្តថា ការពិភាក្សាកាលពីថ្ងៃអាទិត្យ បានគ្របដណ្តប់លើប្រធានបទជាច្រើន រួមទាំងការរំពឹងទុកសម្រាប់ការបោះឆ្នោតនៅអ៊ុយក្រែន និងជម្លោះទឹកដី ។ ការធានាសន្តិសុខសម្រាប់ទីក្រុងគីវក៏មាននៅក្នុងរបៀបវារៈផងដែរ ប៉ុន្តែបញ្ហានេះ នៅមិនទាន់ដោះស្រាយបានទេ ៕