នាយករដ្ឋមន្ត្រីថៃ លោក Anutin Charnvirakul កំពុងប្រឈមនឹងការរិះគន់កាន់តែខ្លាំងឡើង ជុំវិញការឆ្លើយតបយឺតយ៉ាវពីសំណាក់រដ្ឋាភិបាលរបស់លោក ចំពោះទឹកជំនន់ដ៏អាក្រក់បំផុត នៅភាគខាងត្បូងប្រទេស ដោយគំរាមកំហែងរាំងស្ទះដល់មហិច្ឆតារបស់គណបក្សលោក មុនការបោះឆ្នោតមុនអាណត្តិ។

យ៉ាងហោចណាស់មនុស្ស ១៧៦នាក់ បានបាត់បង់ជីវិត ដោយសារទឹកជំនន់ដ៏ធំបំផុតជាលើកដំបូង ក្នុងរយៈពេលជាច្រើនទសវត្សរ៍ ដែលបានហូរកាត់ខេត្តចំនួន ៨ នៅភាគខាងត្បូងរបស់ថៃ កាលពីខែមុន ដោយអ្នកស្លាប់ភាគច្រើន មានទាំងនៅក្នុង និងជុំវិញតំបន់មជ្ឈមណ្ឌលពាណិជ្ជកម្មរបស់ទីក្រុង Hat Yai។

គ្រោះមហន្តរាយបង្កឡើងដោយភ្លៀងធ្លាក់ខ្លាំងបំផុតមួយថ្ងៃ ដែលបានកើតមាននៅទីក្រុង Hat Yai ជាលើកដំបូង ក្នុងរយៈពេល ៣សតវត្សរ៍ គឺជាការសាកល្បងដ៏ធំទី១ សម្រាប់អ្នកនយោបាយវ័យ ៥៩ឆ្នាំដែលបានចូលកាន់តំណែងកាលពីខែកញ្ញា បន្ទាប់ពីអ្នកស្នងតំណែងមុនរបស់លោក ត្រូវបានដកចេញពីតួនាទីនាយករដ្ឋមន្ត្រីដោយដីការបស់តុលាការ។

អ្នកបោះឆ្នោតនៅក្នុងខេត្តដែលរងគ្រោះដោយទឹកជំនន់ និងបណ្ដាអ្នកវិភាគ ឥឡូវនេះ កំពុងលើកជាសំណួរថា តើគណបក្ស Bhumjaithai (ភូមិចៃថៃ) របស់លោក អាចធ្វើតាមការសន្យាបានដែរ ឬទេ នៅពេលដែលប្រទេសឆ្ពោះទៅរកការបោះឆ្នោតដែលត្រូវបានរំពឹងថា នឹងកើតឡើងនៅខែមីនា ឬខែមេសា។

អ្នកវិភាគនយោបាយ លោក Sukhum Nuansakul បានប្រាប់សារព័ត៌មានថា៖ «គ្រោះទឹកជំនន់នេះ បានជះឥទ្ធិពលយ៉ាងខ្លាំងដល់ប្រជាប្រិយភាពរបស់លោក Anutin និងរដ្ឋាភិបាល ព្រោះវាហាក់ដូចជាថា នៅពេលមានភាពអាសន្ន លោក Anutin គឺមិនមានប្រព័ន្ធសមស្រប សម្រាប់ការគ្រប់គ្រងរបស់លោក។ ប្រជាប្រិយភាពរបស់លោកបានធ្លាក់ចុះហើយ»។

ការស្ទង់មតិរបស់សាកលវិទ្យាល័យ Suan Dusit University ដែលបានធ្វើឡើងកាលពីសប្តាហ៍មុន ក្នុងអំឡុងពេលមានទឹកជំនន់ខ្លាំងបំផុត បានរកឃើញថា ការគាំទ្រលើលោក Anutin បានធ្លាក់ចុះពី ៤៨ភាគរយ មកត្រឹមតែ ២៣ភាគរយ។ ការស្ទង់មតិលើមនុស្ស ២.២០៨នាក់ ដែលត្រូវបានចេញផ្សាយកាលពីថ្ងៃអាទិត្យ បានបង្ហាញថា៖ «ទឹកជំនន់មិនត្រឹមតែបង្កការខូចខាតដល់ប្រជាជនប៉ុណ្ណោះទេ តែថែមទាំងប៉ះពាល់ដល់ប្រជាប្រិយភាពរបស់រដ្ឋាភិបាលទៀតផង»៕