យួរបំពង់ទឹកក្តៅដើរឆ្លងកាត់ដងផ្លូវនៅទីក្រុងហ្កាហ្សា យុវជនប៉ាឡេស្ទីន Mohammed Ashour បានស្រែកអំពាវនាវដល់អ្នកដើរឆ្លងកាត់ ដោយសង្ឃឹមថា ពួកគេអាចនឹងទិញកាហ្វេរបស់រូបគេមួយពែង ។

នៅវ័យ ១៥ឆ្នាំ ក្មេងប្រុស Mohammed គួរតែបានចូលសាលារៀនជាមួយមិត្តភក្តិរបស់គេឯទៀត ប៉ុន្តែចាប់តាំងពីឪពុករបស់គេត្រូវបានសម្លាប់នៅក្នុងសង្រ្គាមប្រល័យពូជសាសន៍របស់អ៊ីស្រាអែលនៅហ្កាហ្សាមក ក្មេងប្រុសរូបនេះ ត្រូវបង្ខំចិត្តបោះបង់ចោលការសិក្សារបស់ខ្លួន ហើយរែកពន់ទំនួលខុសត្រូវជាមេគ្រួសារសម្រាប់គ្រួសាររបស់គេ ។

អាជីវករលក់កាហ្វេរូបនេះ និយាយប្រាប់កាសែត Al Jazeera ថា បន្ទុកមិនមែនខ្ញុំត្រូវរែកពន់បែបនេះនោះទេ ។ ការងារនេះ យូរបំពង់ទឹកក្តៅ ពែង ដើទៅមក-ទៅមក វាធ្ងន់ពេកហើយ ខ្ញុំហត់នឿយណាស់ ប៉ុន្តែខ្ញុំត្រូវតែធ្វើការងារនេះ ដើម្បីចិញ្ចឹមប្អូនៗរបស់ខ្ញុំ ។

ក្មេងប្រុស Mohammed ស្ថិតនៅក្នុងចំណោមក្មេងៗប៉ាឡេស្ទីនកើនឡើងនៅតំបន់ហ្កាហ្សាដែលបង្ខំចិត្តធ្វើការងារចិញ្ចឹមគ្រួសារ ដោយសារសង្រ្គាមអ៊ីស្រាអែល ។

ដោយក្មេងៗយ៉ាងហោច ៣៩.០០០នាក់ បាត់បង់ម្តាយ ឬឪពុក ឬបាត់បង់ទាំងម្តាយ-ឪពុក ហើយសេដ្ឋកិច្ចនៅដែនដីមួយនេះ រងភាពខ្ទេចខ្ទាំងដោយសារជម្លោះ ក្មេងៗមានអាយុរហូតដល់ក្រោម ៨ឆ្នាំ បានបង្ខំចិត្តធ្វើការ ដើម្បីចិញ្ចឹមគ្រួសាររបស់ពួកគេ ដោយពួកគេត្រូវបាត់បង់ការសិក្សា ប៉ុន្តែបាត់បង់កុមារភាពរបស់ពួកគេផងដែរ ។

អ្នកស្រី Atad Ashour ជាម្តាយរបស់ក្មេងប្រុស Mohammed និយាយថា គាត់ដឹងថាកូនប្រុសរបស់គាត់គួរទៅសាលារៀន ប៉ុន្តែពួកគេគ្មានជម្រើសនោះទេ ។

អ្នកស្រីបន្តថា ក្រោយឪពុករបស់គេត្រូវបានសម្លាប់រួចមក ពួកយើងគ្មានប្រាក់ចំណូលទាល់តែសោះ ៕