សភាជាតិរបស់ប្រទេសវ៉េណេស៊ុយអេឡាកាលពីថ្ងៃចន្ទ ទី១ ខែធ្នូ បានផ្អាកសម័យប្រជុំវិសាមញ្ញក្នុងការពិភាក្សាដេញដោលអំពីការបង្កើតគណៈកម្មការស៊ើបអង្កេតការវាយប្រហារដ៏ខ្លាំងក្លាដែលបញ្ជាដោយរដ្ឋបាលសហរដ្ឋអាមេរិកប្រឆាំងនាវាដែលសង្ស័យថាជួញដូរគ្រឿងញៀននៅឆ្នេរសមុទ្រវ៉េណេស៊ុយអេឡា និងនៅមហាសមុទ្រប៉ាស៊ីហ្វិកភាគខាងកើត។

ការិយាល័យព័ត៌មានរបស់សភាបាននិយាយថា សម័យប្រជុំត្រូវបានកំណត់ពេលឡើងវិញនៅថ្ងៃអង្គារនេះ ជាថ្ងៃពិភាក្សាដេញដោលតាមធម្មតារបស់ខ្លួន ដោយពុំបានបញ្ជាក់ពីមូលហេតុនៃការពន្យារពេលនោះទេ។ កងទ័ពសហរដ្ឋអាមេរិក បានធ្វើការវាយប្រហារយ៉ាងហោចណាស់២១លើកលើទូកដឹកជញ្ជូនគ្រឿងញៀនតាមដែលត្រូវបានចោទប្រកាន់នៅក្នុងតំបន់ការ៉ាអ៊ីប និងប៉ាស៊ីហ្វិក ចាប់តាំងពីខែកញ្ញាមក ដោយបានសម្លាប់មនុស្សយ៉ាងហោចណាស់៨៣នាក់ ខណៈទីក្រុងវ៉ាស៊ីនតោនកំពុងបង្កើនយោធា។

កាលពីថ្ងៃចន្ទ ប្រភពព័ត៌មានចំនួនពីរដែលដឹងពីបញ្ហានេះបាននិយាយថា ប្រធានាធិបតី លោក Donald Trump នឹងជួបជាមួយទីប្រឹក្សាជាន់ខ្ពស់ដើម្បីពិភាក្សាអំពីប្រទេសវ៉េណេស៊ុយអេឡា បន្ទាប់ពីការបញ្ជាក់របស់លោកកាលពីថ្ងៃអាទិត្យថា លោកបានសន្ទនាជាមួយប្រធានាធិបតីរបស់ប្រទេសនេះ គឺលោក Nicolas Maduro។ ប្រធានរដ្ឋសភា លោក Jorge Rodriguez ដែលជាប្រធានអ្នកចរចារបស់លោក Maduro ជាមួយទីក្រុងវ៉ាស៊ីនតោន បានប្រកាសសម័យប្រជុំកាលពីថ្ងៃចន្ទ បន្ទាប់ពីបានជួបជាមួយសាច់ញាតិរបស់អ្នកស្លាប់ក្នុងការវាយប្រហារលើទូក។ លោក Rodriguez បាននិយាយបន្ថែមថា ការស៊ើបអង្កេតនឹងផ្អែកលើអត្ថបទរបស់សារព័ត៌មាន Washington Post ដែលបានចោទប្រកាន់រដ្ឋមន្ត្រីក្រសួងការពារជាតិអាមេរិក លោក Pete Hegseth ថាបានបញ្ជាឱ្យសម្លាប់មនុស្សគ្រប់គ្នានៅលើទូកអំឡុងពេលវាយប្រហារ កាលពីខែកញ្ញា។