លោកនាយករដ្ឋមន្ត្រីអ៊ីស្រាអែល Benjamin Netanyahu បានបង្ហាញខ្លួននៅតុលាការកាលពីថ្ងៃចន្ទ១ធ្នូដើមប្ដាហ៍នេះ សម្រាប់ថ្ងៃទី៥នៃការសួរចម្លើយរបស់លោកនៅក្នុងសំណុំរឿងលេខ ៤០០០ ជាសំណុំរឿងមួយក្នុងចំណោមសំណុំរឿងទាំងបីប្រឆាំងនឹងរូបលោក មួយថ្ងៃបន្ទាប់ពីដាក់សំណើសុំការលើកលែងទោសទៅកាន់ប្រធានាធិបតី អ៊ីសាក ហឺហ្សូក (Isaac Herzog)។

លោកនាយករដ្ឋមន្ត្រីកំពុងត្រូវបានជំនុំជម្រះទោសពីបទទទួលសំណូក ការក្លែងបន្លំ និងការរំលោភលើទំនុកចិត្តក្នុងសំណុំរឿងលេខ ៤០០០ ត្រូវបានគេស្គាល់ផងដែរថាជាសំណុំរឿង Bezeq-Walla ដែលផ្តោតលើការចោទប្រកាន់ថា លោក Netanyahu បានអនុញ្ញាតការសម្រេចចិត្តផ្នែកបទប្បញ្ញត្តិដែលផ្តល់អត្ថប្រយោជន៍ផ្នែកហិរញ្ញវត្ថុដល់ម្ចាស់ភាគហ៊ុនយក្សទូរគមនាគមន៍ Bezeq គឺលោក Shaul Elovitch រាប់រយលានសេកែល។ 

ជាថ្នូរនឹងការនេះ លោក Netanyahu ត្រូវបានចោទប្រកាន់ថាបានទទួលការផ្សាយព័ត៌មានបំពេញចិត្តពីគេហទំព័រព័ត៌មាន Walla ដែលក៏ជាកម្មសិទ្ធិរបស់លោក Elovitch ផងដែរ។

លោកនាយករដ្ឋមន្ត្រីអ៊ីស្រាអែលរូបនេះ បដិសេធរាល់ការធ្វើខុស ហើយនិយាយថា ករណីទាំងបីត្រូវបានប្រឌិតឡើងដោយនគរបាល និងការចោទប្រកាន់របស់រដ្ឋក្នុងការប៉ុនប៉ងធ្វើរដ្ឋប្រហារនយោបាយ។ សំណើសុំការលើកលែងទោសរបស់លោកកាលពីថ្ងៃអាទិត្យ មិនមានការទទួលស្គាល់ពីកំហុស ឬការសោកស្តាយនោះទេ ប៉ុន្តែបានអះអាងថា វាជាផលប្រយោជន៍ជាតិរបស់អ៊ីស្រាអែលសម្រាប់លោកក្នុងការទទួលបានការលើកលែងទោស ដូច្នេះលោកអាចផ្តោតអារម្មណ៍យ៉ាងពេញលេញលើការដឹកនាំប្រទេស៕