ប្រធានាធិបតីសហរដ្ឋអាមេរិក លោក Donald Trump បានអំពាវនាវឱ្យអ៊ីស្រាអែលរក្សាការសន្ទនា «ហ្មត់ចត់ និងពិតប្រាកដ» ជាមួយប្រទេសស៊ីរី ហើយវាមានសារៈសំខាន់ខ្លាំងដែល «គ្មានអ្វីកើតឡើង ជាការជ្រៀតជ្រែកចូលក្នុងដំណើរវិវត្តន៍របស់ប្រទេសស៊ីរីទៅក្នុងរដ្ឋមានវិបុលភាព»។

សេចក្តីថ្លែងការណ៍នៅលើបណ្តាញ Truth Social កាលពីថ្ងៃចន្ទ បានធ្វើឡើងប៉ុន្មានថ្ងៃបន្ទាប់ពីអ៊ីស្រាអែល បានចាប់ផ្តើមការលុកលុយនិងវាយប្រហារចុងក្រោយរបស់ខ្លួនលើប្រទេសស៊ីរី ដោយបានសម្លាប់មនុស្ស១៣នាក់នៅជនបទខាងក្រៅទីក្រុងដាម៉ាស ជាអ្វីដែលរដ្ឋាភិបាលថ្មីថ្មោងរបស់ប្រធានាធិបតី លោក Ahmed al-Sharaa បានថ្កោលទោសថាជា «ឧក្រិដ្ឋកម្មសង្គ្រាម»។

នៅក្នុងការបង្ហោះនោះ លោកTrump ពុំបាននិយាយសំដៅជាក់លាក់អំពីការលុកលុយរបស់អ៊ីស្រាអែលទេ ជាប្រតិបត្តិការបន្តបន្ទាប់ចុងក្រោយចាប់តាំងពីអ៊ីស្រាអែលបានពង្រីកការកាន់កាប់របស់ខ្លួននៅភាគខាងត្បូងប្រទេសស៊ីរី បន្ទាប់ពីការផ្តួលរំលំមេដឹកនាំយូរអង្វែង លោក Bashar al-Assad កាលពីខែធ្នូ ឆ្នាំមុន។

លោក Trump បានសរសើររដ្ឋាភិបាលថ្មីស៊ីរីក្រោមការដឹកនាំរបស់លោក al-Sharaa ដែលបានសន្យាថានឹងបង្រួបបង្រួមប្រទេសក្រោយពីសង្គ្រាមស៊ីវិលរយៈពេលជាច្រើនឆ្នាំ។ លោកបាននិយាយថា «សហរដ្ឋអាមេរិកពេញចិត្តជាមួយនឹងលទ្ធផលដែលបានបង្ហាញ តាមរយៈការខិតខំប្រឹងប្រែង និងការប្តេជ្ញាចិត្ត នៅក្នុងប្រទេសស៊ីរី»។