ក្រុមមន្រ្តីសុខាភិបាលរបស់ប្រទេសកុងហ្គោ និងមន្រ្តីអង្គការសុខភាពពិភពលោក WHO បានប្រកាសកាលពីថ្ងៃចន្ទ (១ ធ្នូ) ថា ការផ្ទុះឡើងលើកចុងក្រោយបង្អស់នៃមេរោគ អេបូឡា (Ebola) នៅសាធារណរដ្ឋប្រជាធិបតេយ្យកុងហ្គោ ឥឡូវនេះ បានបញ្ចប់ហើយ បន្ទាប់ពីប្រទេសនេះពុំបានរកឃើញករណីឆ្លងថ្មីឡើយ រយៈពេល ៤២ថ្ងៃជាប់ៗគ្នា។

ការផ្ទុះឡើងវិញត្រូវបានប្រកាសដំបូងនៅថ្ងៃទី៤ ខែកញ្ញា បន្ទាប់ពីជំងឺនេះត្រូវបានរកឃើញនៅក្នុងតំបន់សុខភាព Bulape ក្នុងខេត្ត Kasai របស់កុងហ្គោ ដែលជាករណីដំបូងរបស់ប្រទេស ចាប់តាំងពីឆ្នាំ២០២២ មក។ ក្រសួងសុខាភិបាលកុងហ្គោ បានឱ្យដឹងថា ក្នុងចំណោមករណីសរុបចំនួន ៦៤ករណី មានមនុស្ស ៤៥នាក់ បានស្លាប់ និង ១៩នាក់ ទៀតបានជាសះស្បើយ។

ការផ្ទុះឡើងនៃមេរោគ អេបូឡា ចុងក្រោយនេះ គឺជាលើកទី១៦ ហើយ របស់ប្រទេសអាហ្រ្វិកកណ្តាលមួយនេះ ចាប់តាំងពីជំងឺ អេបូឡា ត្រូវរកឃើញជាលើកដំបូងក្នុងឆ្នាំ១៩៧៦ មក នេះបើយោងតាមអង្គការសុខភាពពិភពលោក។

គួរឱ្យដឹងថា អេបូឡា ឬត្រូវគេស្គាល់ពីមុនថា ជំងឺគ្រុនឈាមអាហ្រ្វិក ជាជំងឺបង្កឡើងដោយវីរុសដែលមានលក្ខណៈធ្ងន់ធ្ងរបំផុត កើតឡើងនៅលើមនុស្ស ហើយមានអត្រាស្លាប់ខ្ពស់៕