អាជ្ញាធរសុខាភិបាលតំបន់បាននិយាយកាលពីថ្ងៃចន្ទ ទី ១ ខែធ្នូ ថា មនុស្សយ៉ាងហោចណាស់ ១៣ នាក់បានស្លាប់ និង២០នាក់ផ្សេងទៀតរងរបួស បន្ទាប់ពីបំណាក់ដីនៅតំបន់អាម៉ាហ្សូនប្រទេសប៉េរូ ដោយបានបណ្តាលឲ្យលិចទូកពីរគ្រឿងនៅលើទន្លេ Ucayali។

យោងតាមទីភ្នាក់ងារសារព័ត៌មានប៉េរូ Andina បានឲ្យដឹងថា មនុស្ស១៣នាក់ត្រូវបានបញ្ជាក់ថាស្លាប់ និង ២៨ នាក់នៅបាត់ខ្លួន បន្ទាប់ពីបំណាក់ដីដែលបានកើតឡើងនៅក្នុងតំបន់កំពង់ផែ Iparia មានចម្ងាយប្រហែល៤១៥គីឡូម៉ែត្រភាគឦសានរដ្ឋធានីប៉េរូ ដោយបានធ្វើឲ្យប៉ះពាល់ដល់ទូកពីរគ្រឿងដែលកំពុងធ្វើដំណើរទៅកាន់ទីក្រុងផ្សេងទៀតតាមបណ្តោយដងទន្លេ។

ទូកឈ្មោះ Rapido Oriente បានលិចទាំងស្រុង ខណៈទូកមួយផ្សេងទៀតឈ្មោះ Deo Rigo បានរងការខូចខាតធ្ងន់ធ្ងរ នេះបើយោងតាមរបាយការណ៍របស់សារព័ត៌មាន Andina។ សារព័ត៌មាននេះនិយាយថា ទូក Deo Rigo កំពុងធ្វើដំណើរពីសហគមន៍ជនជាតិដើមភាគតិចដែលនៅក្បែរនោះ ហើយបានឈប់នៅតំបន់កំពង់ផែ Iparia ដើម្បីឱ្យអ្នកដំណើរអាចចុះពីលើទូកនៅពេលនោះបំណាក់ដីបានកើតឡើង។

សារព័ត៌មាន Andina និយាយថា គ្រូបង្រៀន និងវេជ្ជបណ្ឌិតស្ថិតក្នុងចំណោមអ្នកដំណើរ។ នគរបាលប្រទេសប៉េរូ បានចែករំលែកវីដេអូ ដែលភ្នាក់ងារត្រូវបានដាក់ពង្រាយដើម្បីអនុវត្តប្រតិបត្តិការស្វែងរក និងជួយសង្គ្រោះ។