ប្រធានាធិបតីអាមេរិក លោក ដូណាល់ ត្រាំ (Donald Trump)កាលពីថ្ងៃចន្ទ បានព្រមានអ៊ីស្រាអែលកុំឲ្យបង្កអស្ថិរភាពដល់ប្រទេសស៊ីរី និងថ្នាក់ដឹកនាំថ្មីរបស់ខ្លួន រយៈពេលប៉ុន្មានថ្ងៃបន្ទាប់ពីប្រតិបត្តិការមួយបង្កឲ្យមនុស្សស្លាប់យ៉ាងច្រើនដោយកងកម្លាំងអ៊ីស្រាអែល នៅភាគខាងត្បូងនៃប្រទេសនេះ។

លោក ត្រាំ បាននិយាយនៅលើកម្មវិធីនៃប្រព័ន្ធផ្សព្វផ្សាយសង្គម Truth Social របស់លោកថា៖«វាពិតជាមានសារៈសំខាន់ខ្លាំងណាស់ ដែលអ៊ីស្រាអែលរក្សាការសន្ទនាដ៏ម៉ឺងមាត់ និងពិតប្រាកដជាមួយស៊ីរី ហើយគ្មានអ្វីកើតឡើងដែលនឹងជ្រៀតជ្រែកដល់ការវិវត្តរបស់ស៊ីរី ទៅជារដ្ឋដ៏រុងរឿងនោះទេ»។

លោក ត្រាំ បានថ្លែងថា៖ លោក «ពេញចិត្តយ៉ាងខ្លាំង» ជាមួយនឹងការអនុវត្តរបស់ស៊ីរី ក្រោមការដឹកនាំរបស់លោកប្រធានាធិបតី Ahmad Al-Sharaa ដែលបានធ្វើដំណើរទស្សនកិច្ចជាប្រវត្តិសាស្ត្រ ទៅកាន់សេតវិមាន កាលពីខែវិច្ឆិកា។

លោក បានជំរុញឲ្យមានកិច្ចព្រមព្រៀងសន្តិសុខរវាងអ៊ីស្រាអែល និងស៊ីរី ចាប់តាំងពីសម្ព័ន្ធភាពរបស់លោក Sharaa បានផ្តួលរំលំមេដឹកនាំកាន់អំណាចដ៏យូរ គឺលោក បាសា អាល់អាសាដ ( Bashar al-Assad ) កាលពីមួយឆ្នាំមុន។

ប៉ុន្តែភាពតានតឹងបានកើនឡើង ដោយសារតែការវាយប្រហាររាប់រយលើកដោយអ៊ីស្រាអែលលើប្រទេស    ស៊ីរី។ ក្នុងការវាយប្រហារបណ្តាលឲ្យមនុស្សស្លាប់ច្រើនបំផុត រហូតមកដល់ពេលនេះ កងកម្លាំងអ៊ីស្រា      អែល បានសម្លាប់មនុស្ស ១៣នាក់ កាលពីថ្ងៃសុក្រ (ទី២៨ ខែវិច្ឆិកា) នៅក្នុងប្រតិបត្តិការមួយ នៅភាគខាងត្បូងប្រទេសស៊ីរី ដោយនិយាយថា ពួកគេបានកំណត់គោលដៅលើក្រុមជ្រុលនិយមមួយក្រុម។ 

លោក ត្រាំ បាននិយាយថា លោក Sharaa «កំពុងធ្វើការយ៉ាងយកចិត្តទុកដាក់ ដើម្បីធានាថា រឿងល្អៗកើតឡើង ហើយទាំងស៊ីរី និងអ៊ីស្រាអែល នឹងមានទំនាក់ទំនងយូរអង្វែង និងរីកចម្រើនជាមួយគ្នា»៕