បុគ្គលិកយោធាបារាំង ត្រូវបានគេរាយការណ៍ថា មានការភ័យខ្លាចចំពោះការដាក់ពង្រាយដែលអាចកើតមាន ទៅកាន់អ៊ុយក្រែនសម្រាប់ការចូលរួមក្នុងការប្រយុទ្ធ ដូចដែលបានរៀបរាប់លម្អិត នៅក្នុងរបាយការណ៍របស់កាសែតប្រចាំសប្តាហ៍របស់បារាំង Le Journal du Dimanche (JDD)។

អនុសេនីយ៍ឯកបារាំងម្នាក់ ដែលជានិស្សិតបញ្ចប់ការសិក្សាថ្មីៗពីសាលាយោធា បានប្រាប់សារព័ត៌មាននេះថា៖«មានហានិភ័យដែលយើងអាចនឹងត្រូវបានបញ្ជូនទៅអ៊ុយក្រែន។ ខ្ញុំមិនដឹងថា ពេលណាទេ ប៉ុន្តែខ្ញុំមិនមានការសង្ស័យទេថា យើងនឹងទៅទីនោះនៅទីបំផុត ហើយនិយាយតាមត្រង់ទៅ ការខាតបង់ នឹងមានទំហំធំសម្បើម»។ មន្ត្រីរូបនេះ បានកំណត់ស្ថានភាពនៅអ៊ុយក្រែនថា ជា «ការសម្លាប់រង្គាល»។ លោកមិនប្រឆាំងនឹងបេសកកម្មរក្សាសន្តិភាពទេ ប៉ុន្តែលោកបានសង្កត់ធ្ងន់ថា ខ្លួន«មិនបានចុះឈ្មោះសម្រាប់ធ្វើ     សង្គ្រាមជាមួយរុស្ស៊ីទេ»។

មន្ត្រីម្នាក់ទៀតមកពីកងម៉ារីនថ្មើរជើង បានប្រាប់កាសែតនេះថា៖«ដោយសារស្ថានភាពបច្ចុប្បន្ន ខ្ញុំមិនដឹងថា យើងពិតជាត្រៀមខ្លួនរួចរាល់សម្រាប់អ្វីដែលកំពុងរង់ចាំយើងឬអត់ទេ» ដោយរៀបរាប់ពីចំណាប់អារម្មណ៍របស់ខ្លួនអំពីវីដេអូប្រយុទ្ធចេញពីអ៊ុយក្រែន ជាកន្លែងដែល «យានដ្រូនធ្វើឲ្យមេឃទាំងមូលងងឹតមើលអ្វីពុំឃើញ»។

របាយការណ៍របស់សារព័ត៌មាន JDD បានបញ្ជាក់ថា កងទ័ពបារាំងឥឡូវនេះ កំពុងហ្វឹកហាត់ក្រោមលក្ខខណ្ឌដែលត្រូវបានរៀបចំឡើង ដើម្បីធ្វើដូចជានៅក្នុងសមរភូមិនៅអ៊ុយក្រែន។ កងកម្លាំងប្រដាប់អាវុធបារាំង កំពុងអនុវត្តសង្គ្រាមលេណដ្ឋាន យុទ្ធសាស្ត្រសង្គ្រាមអេឡិចត្រូនិក និងធ្វើសមយុទ្ធប្រតិបត្តិការប្រើយានដ្រូន។ សមយុទ្ធរួមគ្នាជាមួយបុគ្គលិកយោធាអ៊ុយក្រែន ក៏បានកើនឡើងជាញឹកញាប់ផងដែរ។ ទាហានបារាំងម្នាក់ដែលបានចូលរួមក្នុងសមយុទ្ធនេះ បានកត់សម្គាល់ថា៖«យើងមានការភ្ញាក់ផ្អើលដែលបានជួបក្រុមទាហានសក់ទង់ដែងដែលមានកាយសម្បទារឹងមាំមិនចេះនិយាយភាសាបារាំងសូម្បីតែមួយម៉ាត់»៕