ក្រុមមន្រ្តីបានបញ្ជាក់ថា ប្រធានាធិបតីរុស្ស៊ី លោក Vladimir Putin នឹងចាប់ផ្តើមដំណើរទស្សនកិច្ចរយៈពេល ២ថ្ងៃ ទៅកាន់ប្រទេសឥណ្ឌា ចាប់ពីថ្ងៃព្រហស្បតិ៍ ទី៤ ខែធ្នូ ក្នុងសប្ដាហ៍នេះ ដើម្បីជំរុញឱ្យមានការលក់ប្រេង ប្រព័ន្ធមីស៊ីល និងយន្តហោះចម្បាំងរបស់រុស្ស៊ី បន្ថែមទៀត ក្នុងកិច្ចខិតខំប្រឹងប្រែងស្តារទំនាក់ទំនងវិស័យថាមពល និងការពារជាតិជាមួយឥណ្ឌា ដែលរងផលប៉ះពាល់ដោយសម្ពាធរបស់សហរដ្ឋអាមេរិក លើប្រទេសអាស៊ីខាងត្បូងមួយនេះ។

រុស្ស៊ីបានផ្គត់ផ្គង់អាវុធដល់ឥណ្ឌា អស់ជាច្រើនទសវត្សរ៍មកហើយ ដោយទីក្រុងញូវដែលី បានក្លាយជាអ្នកទិញប្រេងតាមសមុទ្រធំជាងគេរបស់រុស្ស៊ី ទោះបីជាមានទណ្ឌកម្មពីលោកខាងលិចក៏ដោយ ជុំវិញយុទ្ធនាការយោធាលើអ៊ុយក្រែន ក្នុងខែកុម្ភៈ ឆ្នាំ២០២២។ ប៉ុន្តែការនាំចូលប្រេងឆៅរបស់ឥណ្ឌា នឹងធ្លាក់ចុះដល់កម្រិតទាបបំផុតក្នុងពេល ៣ឆ្នាំនៅខែធ្នូនេះ បន្ទាប់ពីទណ្ឌកម្មកាន់តែតឹងរ៉ឹងលើរុស្ស៊ី។

ក្នុងទស្សនកិច្ចលើកដំបូងរបស់លោកក្នុងរយៈពេល ៤ឆ្នាំទៅកាន់រដ្ឋធានីឥណ្ឌា សម្រាប់កិច្ចប្រជុំកំពូលជាមួយលោកនាយករដ្ឋមន្ត្រី Narendra Modi លោក Putin នឹងត្រូវអមដំណើរដោយរដ្ឋមន្ត្រីការពារជាតិរុស្ស៊ី គឺលោក Andrei Belousov និងគណៈប្រតិភូជាច្រើនក្នុងវិស័យអាជីវកម្ម និងឧស្សាហកម្ម។

ក្រុមមន្ត្រីឥណ្ឌាបារម្ភថា កិច្ចព្រមព្រៀងថាមពល និងការពារជាតិថ្មីៗណាមួយជាមួយរុស្ស៊ី អាចបង្កឱ្យមានប្រតិកម្មតបពីលោកប្រធានាធិបតីអាមេរិក Donald Trump ដែលបានដំឡើងពន្ធទ្វេដងដល់ ៥០% ក្នុងខែសីហា លើទំនិញឥណ្ឌា ដោយសារតែទីក្រុងដែលី ទិញប្រេងឆៅរបស់រុស្ស៊ី៕