ឯកអគ្គរដ្ឋទូតចិន ប្រចាំនៅអង្គការសហប្រជាជាតិ (UN) កាលពីថ្ងៃចន្ទ (ទី១ ខែធ្នូ) បានផ្ញើលិខិតមួយច្បាប់ផ្សេងទៀតទៅកាន់អគ្គលេខាធិការ UN លោក Antonio Guterres ដោយបានរិះគន់នាយករដ្ឋមន្ត្រីជប៉ុន លោកស្រី Sanae Takaichi ចំពោះការលើកឡើង «បង្កហេតុ» ជុំវិញបញ្ហាកោះតៃវ៉ាន់ និងជំរុញឲ្យលោកស្រីដកពាក្យសម្ដីនោះចេញជាបន្ទាន់។

ស្របពេលជម្លោះការទូតឡើងកម្ដៅកាន់តែខ្លាំង រវាងប្រទេសអាស៊ីទាំង២ លិខិតច្បាប់ទី២ របស់លោក Fu Cong បានបដិសេធជំហររបស់ជប៉ុន ដែលមាននៅក្នុងលិខិតផ្ញើដោយឯកអគ្គរដ្ឋទូត ប្រចាំនៅ UN របស់ប្រទេសនេះ គឺលោក Kazuyuki Yamazaki កាលពីថ្ងៃទី២៤ ខែវិច្ឆិកា ហើយបានចោទប្រកាន់ទីក្រុងតូក្យូថា បាន «លើកឡើងនូវហេតុផលមិនសមររម្យ»។

គួរបញ្ជាក់ថា ប្រទេសចិនបានប្រកាន់គោលជំហរយ៉ាងម៉ឹងម៉ាង់ ប្រឆាំងនឹងជប៉ុន ចាប់តាំងពីលោកស្រី Takaichi បានលើកឡើងកាលពីថ្ងៃទី៧ ខែវិច្ឆិកា ក្នុងអំឡុងពេលផ្ដល់សុន្ទរកថា នៅសភា ដែលថា ការវាយប្រហារលើកោះតៃវ៉ាន់ អាចបង្កើតបានជាការគំរាមកំហែងដល់ការរស់នៅ សម្រាប់ប្រទេសជប៉ុន ហើយតម្រូវឲ្យមានការឆ្លើយតបពីកងកម្លាំងស្វ័យការពាររបស់ខ្លួន នៅពេលដែលត្រូវបានសមាជិកសភាគណបក្សប្រឆាំងសួរដោយសន្មតថា ប្រសិនបើមានស្ថានភាពបែបនេះ។

យ៉ាងណាក្ដី លិខិតរបស់លោក Fu ដែលមានបន្ទាប់ពីលោកបានផ្ញើមួយច្បាប់ទៅកាន់លោក Guterres កាលពីថ្ងៃទី២១ ខែវិច្ឆិកា បានព្រមានថា «សហគមន៍អន្តរជាតិត្រូវតែមានការប្រុងប្រយ័ត្នខ្ពស់ ប្រឆាំងនឹងមហិច្ឆតារបស់ជប៉ុន ក្នុងការពង្រីកសមត្ថភាពយោធារបស់ខ្លួន និងធ្វើឲ្យលទ្ធិយោធានិយមរស់ឡើងវិញ»៕