​សហរដ្ឋអាមេរិក៖ សេត​វិមាន​បាន​ឆ្លើយតប​កាលពី​យប់​ថ្ងៃ​ចន្ទ ចំពោះ​កា​រ​សម្រេច​ចិត្ត​របស់​ប្រធានាធិបតី​រុស្ស៊ី​លោក Vladimir Putin ទទួលស្គាល់​ឯករាជ្យ​ភាព​របស់​តំបន់​ផ្ដាច់ខ្លួន​ចំនួន​ ២​ នៅ​ប្រទេស​អ៊ុយ​ក្រែ​នភា​គ​ខាងកើតដោយ​ការ​ដាក់​ទណ្ឌកម្ម​លើ​តំបន់​នោះ​។ ​លោក​ប្រធានា​ធិ​បតី Joe Biden បាន​ចុះហត្ថលេខា​លើ​ក្រឹត្យ​ដែល​ហាម​ការ​វិនិយោគ ការ​ធ្វើ​ពាណិជ្ជកម្ម និង​ការ​ផ្ដល់​ហិរញ្ញ​វប្ប​ទាន​ថ្មីដោយ​ជន​ជាតិ​​អាមេរិកទាំង​ទៅ ​ទាំង​មក ឬ​នៅ​ក្នុង​តំបន់​របស់​ប្រទេស​អ៊ុយ​ក្រែ​ន​ដែល​ហៅថា ជា​សាធារណរដ្ឋ​ប្រជាមានិត Donetsk និង​សាធារណរដ្ឋ​ប្រជាមានិត Luhansk។​

​អ្នកនាំពាក្យ​សេត​វិមានលោកស្រី Jen Psaki បាន​សរសេរ​នៅក្នុង​សេចក្ដីថ្លែងការណ៍​ដែល​កំពុង​ប្រកាស​ពី​ក្រឹត្យ​ខាងលើ​ថា វា​ច្បាស់ណាស់​ថា វិធានការ​ទាំងនេះគឺ​ដាច់ដោយឡែក​ពីគ្នា នឹង​ជាការ​បន្ថែម​ពីលើ​ទណ្ឌកម្មសេដ្ឋកិច្ច​ដ៏​ធ្ងន់ធ្ងរ​ និង​ភ្លាមៗដែល​យើង​បាន​ត្រៀម​ក្រោម​ការ​សម្រប​សម្រួល​ជាមួយ​សម្ព័ន្ធមិត្ត​ និង​ដៃគូ​របស់​យើង បើសិន​មានការ​ឈ្លានពាន​បន្ថែម​ទៀតពីរុស្ស៊ី​ចូលអ៊ុយ​ក្រែ​ន​។ ​លោកស្រី Psaki បាន​បន្ថែមថា ក្រសួងការបរទេស និង​រតនាគារនឹង​ចែករំលែក​ព័ត៌មាន​លម្អិត​បន្ថែមទៀតពី​ចំណាត់ការ​របស់​រដ្ឋបាល​លោក Biden​។ ​បណ្ដា​មេដឹកនាំ​សហភាព​អឺរ៉ុបក៏បាន​ថ្កោលទោស​ផងដែរពី​ការប្រកាស​របស់លោក Putin និង​បានបញ្ចេញ​ការ​គំរាម​ថ្មីឆ្លើយតប​ទៅនឹង​ការបំពាន​ដ៏​ធ្ងន់ធ្ងរ​លើ​ច្បាប់​អន្តរជាតិ​។ ​លោក Josep Borrell ប្រធាន​គោលនយោបាយ​សហភាព​អឺរ៉ុប​បាន​និយាយថា ប្លុក​ដែលមាន​សមាជិក ​២៧​ប្រទេសបានសម្រេច​រួចហើយ​ពី​ការប្រើប្រាស់​កញ្ចប់​ទណ្ឌកម្ម​របស់ខ្លួន បើលោក Putin ឈ្លានពាន​អ៊ុយ​ក្រែ​ន​៕

អត្ថបទ៖ សុខមាន