ប្រធានាធិបតីវ៉េណេស៊ុយអេឡា លោក Nicolas Maduro កំពុងមានជម្រើសកាន់តែតិចទៅៗ ក្នុងការចុះចេញពីតំណែង និងចាកចេញពីប្រទេសរបស់លោក ក្រោមការធានាសុវត្ថិភាពដោយសហរដ្ឋអាមេរិក បន្ទាប់ពីបានជជែកតាមទូរសព្ទរយៈពេលខ្លីមួយជាមួយលោក Donald Trump កាលពីខែវិច្ឆិកា ជាពេលដែលប្រធានាធិបតីអាមេរិកបានបដិសេធសំណើជាបន្តបន្ទាប់របស់មេដឹកនាំវ៉េណេស៊ុយអេឡា។ នេះបើយោងតាមប្រភពចំនួន៤ ដែលបានប្រាប់ឲ្យដឹង អំពីការសន្ទនានេះ។

ការជជែកតាមទូរសព្ទ កាលពីថ្ងៃទី២១ ខែវិច្ឆិកា បានធ្វើឡើងបន្ទាប់ពីសហរដ្ឋអាមេរិកបានបង្កើនសម្ពាធជាច្រើនខែ លើវ៉េណេស៊ុយអេឡា ក្នុងនោះរួមទាំងការវាយប្រហារប្រឆាំងនឹងទូកសង្ស័យរត់ពន្ធគ្រឿងញៀន នៅតំបន់ការ៉ាអ៊ីប ការគំរាមកំហែងម្តងហើយម្តងទៀតពីលោក Trump ក្នុងការពង្រីកប្រតិបត្តិការយោធា នៅលើដីគោក និងការកំណត់ឈ្មោះក្រុម Cartel de los Soles ជាក្រុមដែលរដ្ឋបាលរបស់លោក Trump ប្រាប់ថា រួមមានលោក Maduro ផងដែរនោះ ជាអង្គការភេរវករបរទេស។

លោក Maduro និងរដ្ឋាភិបាលរបស់លោក តែងតែបដិសេធរាល់ការចោទប្រកាន់បទឧក្រិដ្ឋ ហើយនិយាយថា សហរដ្ឋអាមេរិកកំពុងស្វែងរកការផ្លាស់ប្តូររបប ដើម្បីគ្រប់គ្រងធនធានធម្មជាតិដ៏ធំរបស់វ៉េណេស៊ុយអេឡា ក្នុងនោះរួមទាំងប្រេងផងដែរ។

ប្រភពចំនួន ៣ បាននិយាយថា លោក Maduro បានប្រាប់លោក Trump ក្នុងអំឡុងពេលសន្ទនាតាមទូរសព្ទនោះថា លោកសុខចិត្តចាកចេញពីប្រទេសវ៉េណេស៊ុយអេឡា ប្រសិនបើលោក និងសមាជិកគ្រួសាររបស់លោក ទទួលបានការលើកលែងទោសតាមផ្លូវច្បាប់ពេញលេញ ក្នុងនោះរួមទាំងការដកទណ្ឌកម្មរបស់អាមេរិកទាំងអស់ និងការបញ្ចប់សំណុំរឿងដ៏ធំដែលលោកត្រូវប្រឈមនៅចំពោះមុខតុលាការព្រហ្មទណ្ឌអន្តរជាតិផងដែរ។ ហើយលោកក៏បានស្នើឲ្យមានការដកទណ្ឌកម្មលើមន្ត្រីរដ្ឋាភិបាលវ៉េណេស៊ុយអេឡា ១០០នាក់ ដែលភាគច្រើនត្រូវបានសហរដ្ឋអាមេរិកចោទពីបទរំលោភសិទ្ធមនុស្ស ជួញដូរគ្រឿងញៀន ឬអំពើពុករលួយ។

យ៉ាងណាក្ដី លោក Trump បានច្រានចោលសំណើភាគច្រើន អំឡុងពេលជជែកតាមទូរសព្ទដែលមានរយៈពេលមិនដល់ ១៥នាទីនោះ ប៉ុន្តែបានប្រាប់លោក Maduro ថា លោកមានពេលមួយសប្តាហ៍ ដើម្បីចាកចេញពីវ៉េណេស៊ុយអេឡា ទៅកាន់ទិសដៅដែលលោកជ្រើសរើស ជាមួយសមាជិកគ្រួសាររបស់លោក៕