បណ្ដាអ្នកជំនាញសិទ្ធិមនុស្សរបស់អង្គការសហប្រជាជាតិ (UN) កាលពីថ្ងៃចន្ទ (ទី១ ខែធ្នូ) បានបង្ហាញនូវក្ដីបារម្ភ អំពីការពិភាក្សារបស់សហភាពអឺរ៉ុប (EU) ស្តីពីការស្នើឡើងនូវច្បាប់ដែលសំដៅលើការរត់ពន្ធជនអន្តោប្រវេសន៍ ដោយបានព្រមានថា ការណ៍ដែលមិនមានការលើកលែងដល់ក្រុមមនុស្សធម៌ជាកាតព្វកិច្ច អាចធ្វើឲ្យអ្នកជួយសង្គ្រោះអាយុជីវិតត្រូវប្រឈមនឹងការកាត់ទោសព្រហ្មទណ្ឌ។

អ្នកជំនាញទាំងនោះបានលើកឡើងនៅក្នុងសេចក្តីថ្លែងការណ៍មួយថា៖ «ប្រសិនបើគ្មានការកំណត់ឲ្យបានច្បាស់លាស់នូវករណីលើកលែងផ្នែកមនុស្សធម៌ជាកាតព្វកិច្ចទេនោះ វាមានហានិភ័យធ្ងន់ធ្ងរ ក្នុងការមានទោសព្រហ្មទណ្ឌ ដោយសារសកម្មភាពសង្គ្រោះអាយុជីវិត និងការផ្ដល់ជំនួយដល់ជនរងគ្រោះនៃការជួញដូរមនុស្ស ជនអន្តោប្រវេសន៍ ជនភៀសខ្លួន អ្នកស្វែងរកសិទ្ធិជ្រកកោន និងមនុស្សផ្សេងទៀតដែលត្រូវការការការពារពីអន្តរជាតិ ក្នុងនោះរួមទាំងកុមារផងដែរ»។

គួរបញ្ជាក់ថា ការព្រមានរបស់អ្នកជំនាញនេះ បានកើតមានឡើង នៅពេលដែលសភាអឺរ៉ុបពិនិត្យមើលសំណើរបស់គណៈកម្មការអឺរ៉ុប សម្រាប់សេចក្តីណែនាំ ស្តីពីការសម្របសម្រួលដែលត្រូវបានកែសម្រួលដែលបានបង្ហាញនៅថ្ងៃទី២៨ ខែវិច្ឆិកា ឆ្នាំ២០២៣។ ហើយយោងតាមអ្នកជំនាញ បានឲ្យដឹងថា សេចក្តីព្រាងច្បាប់នេះ «ប្រថុយឲ្យមានការកាត់ទោសបទល្មើសព្រហ្មទណ្ឌ ចំពោះអ្នកដែលកំពុងជួយ និងការពារមនុស្សដែលជីវិត ឬសុវត្ថិភាពរបស់ពួកគេ កំពុងស្ថិតគ្រោះថ្នាក់»។

បណ្ដាអ្នកជំនាញទាំងនោះបានសង្កត់ធ្ងន់ថា ការលើកលែងដល់ក្រុមមនុស្សធម៌ជាកាតព្វកិច្ច នឹងស្របតាមពិធីសាររបស់ UN ប្រឆាំងនឹងការរត់ពន្ធជនអន្តោប្រវេសន៍ ហើយស្របនឹងកាតព្វកិច្ចផ្លូវច្បាប់អន្តរជាតិ ក្នុងការជួយប្រជាជនដែលមានទុក្ខព្រួយ៕