​វាយ​កូន​បាល់​៖ ​កីឡាករ​វាយ​កូន​បាល់​លេខ ១ ពិភពលោក Novak Djokovic បាន​ចូល​លេង​ការប្រកួត​ដំបូង​តាំងពី​មាន​បញ្ហា​រឿង​ទិដ្ឋាការ​វ៉ាក់សាំង​នៅ Grand Slam, Australian Open​។ ​Djokovic បាន​យក​ឈ្នះ​កីឡាករ​អ៊ីតាលី Lorenzo Musetti ៦-៣ និង ៦-៣ នៃ​ជុំ​ដំបូង​កម្មវិធី Dubai Tennis Championship​។​

​​Djokovic បានបង្ហាញ​អារម្មណ៍​រីករាយ​ ចំពោះ​ការវិល​ត្រលប់មក​សកម្មភាព​វាយ​កូន​បាល់​របស់ខ្លួន​វិញ​នេះ បន្ទាប់ពី​មាន​បញ្ហា​ស្មុគស្មាញ​មួយរយៈ​ចុងក្រោយ​នេះ​។ ​កាលពី​សប្តាហ៍​មុននិយាយប្រាប់​សារព័ត៌មាន BBC របស់​អង់គ្លេស ម្ចាស់​ជើងឯក Grand Slam ២០លើក​រូបនេះ​បានឱ្យដឹងថា រូបគេ​សុខចិត្ត​អវត្តមាន​ពី​ការប្រកួត​វាយ​កូន​បាល់​គ្រប់​កម្មវិធី​ប្រកួត​ទាំងអស់​នាពេលខាងមុខ ប្រសើរ​ជាង​ការបង្ខំចិត្ត​ទទួលយក​វ៉ាក់សាំង​កូ​វីដ​-១៩​។ ​​កីឡាករ​វ័យ ៣៤ឆ្នាំ​រូបនេះ​ត្រូវបាន​បញ្ជា​ឱ្យ​ចាក​ចេញពី​ព្រលានយន្តហោះ​ប្រទេស​អូស្ត្រាលី កាលពី​ខែមករា​ដោយសារតែ​ការស្នើសុំ​ទិ​ដ្ឋា​ការមិន​មានភ្ជាប់​ជាមួយ​លិខិត​អះអាងថា​ បាន​ចាក់​វ៉ាក់សាំង​។ ​​Djokovic បាន​បញ្ជាក់ថា រូបគេ​មិនបានចូលរួម​ជាមួយនឹង​ចលនា​ប្រឆាំង​វ៉ាក់សាំង​ឡើយ តែ​ចង់ឱ្យ​ការទទួលយក​វ៉ាក់សាំង​គឺជា​សិទ្ធិ​របស់​បុគ្គល​វិញ​៕

​អត្ថបទ​៖​នាង សុភា​វុ​ធ