កងកម្លាំងគាំទ្ររហ័ស(RSF)របស់ស៊ូដង់ និយាយថា ពួកគេដណ្តើមបានការគ្រប់គ្រងទីក្រុង Babanusa ដែលជាមជ្ឈមណ្ឌលដឹកជញ្ជូននៅតំបន់ភាគខាងត្បូងប្រទេស និងជាតំបន់ផលិតប្រេងដ៏សំខាន់របស់ស៊ូដង់ ។

រូបភាពវីដេអូឃ្លីបនៅលើបណ្តាញព័ត៌មានសង្គមដែលបានបញ្ចេញកាលពីថ្ងៃចន្ទ ឃើញក្រុមប្រដាប់អាវុធក្នុងឯកសណ្ឋានកងកម្លាំង RSF បាញ់កាំភ្លើងរបស់ពួកគេ និងស្រែកអបអរសាទរនៅក្រៅខ្លោងទ្វារមានស្លាកសញ្ញាអារ៉ាប់សរសេរថា “កងពលថ្មើរជើងលេខ ២២នៃកងកម្លាំង RSF នៅទីក្រុង Babanusa” ។

កងកម្លាំង RSF និយាយនៅក្នុងសេចក្តីថ្លែងការណ៍ថា ការរំដោះទីក្រុង Babanusa ស្ថិតក្នុងរដ្ឋ West Kordofan ដែលជាតំបន់ជួរមុខចុងក្រោយនៃសង្រ្គាមនៅស៊ូដង់ បានកើតមាន ក្រោយពួកគេរុញច្រានការវាយប្រហារដ៏គួរភ្ញាក់ផ្អើលរបស់កងទ័ពស៊ូដង់ ជាអ្វីដែលពួកគេចាត់ទុកថាជាការបំពានយ៉ាងច្បាស់ក្រឡែតលើបទឈប់បាញ់មនុស្សធម៌ ។

គួរឲ្យដឹងថា កាលពីថ្ងៃទី ១៩ ខែវិច្ឆិកាកន្លងទៅ ប្រធានាធិបតីសហរដ្ឋអាមេរិកលោក Donald Trump និយាយថា លោកនឹងធ្វើអន្តរាគមន៍ ដើម្បីបញ្ឈប់ជម្លោះមួយនេះ ដែលបានផ្ទុះឡើងកាលពីខែមេសា ឆ្នាំ ២០២៣ ៕