វិមានក្រឹមឡាំងបានប្រាប់ឲ្យដឹងថា លោកប្រធានាធិបតី Vladimir Putin នឹងជួបជាមួយបេសកជនពិសេសរបស់សហរដ្ឋអាមេរិក គឺលោក Steve Witkoff នៅទីក្រុងមូស្គូ នារសៀលថ្ងៃអង្គារ (ទី២ ខែធ្នូ) នេះ ដើម្បីពិភាក្សាសំណើពីចុងក្រោយរបស់រដ្ឋបាលលោក Donald Trump ដែលមានគោលបំណងបញ្ចប់សង្រ្គាម នៅអ៊ុយក្រែន។

នៅឯសន្និសីទសារព័ត៌មានមួយ កាលពីថ្ងៃចន្ទ ដោយបានបន្ថែមថា ជំនួបនោះនឹងប្រព្រឹត្តទៅ «ថ្ងៃរសៀល» អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «កិច្ចប្រជុំជាមួយលោក Witkoff ត្រូវបានគ្រោងទុកនៅថ្ងៃស្អែក (ថ្ងៃអង្គារ)» ។

លោក Witkoff ដែលប្រែក្លាយជាបេសកជនពិសេសពីមហាសេដ្ឋីអចលនទ្រព្យនោះ ត្រូវបានគេរំពឹងថា នឹងទៅដល់ទីក្រុងមូស្គូជាមួយលោក Jared Kushner កូនប្រសាររបស់ប្រធានាធិបតីអាមេរិក លោក Trump ដើម្បីពិភាក្សាអំពីក្របខ័ណ្ឌសន្តិភាពដែលមន្ត្រីអាមេរិក និងអ៊ុយក្រែន បានព្រាងកាលពីចុងសប្តាហ៍មុន នៅទីក្រុងហ្សឺណែវ ប្រទេសស្វីស។

នៅក្នុងសេចក្តីថ្លែងការណ៍របស់ខ្លួន កាលពីថ្ងៃចន្ទនោះ វិមានក្រឹមឡាំងមិនបានលើកឡើងពីលោក Kushner ឡើយ។ នេះនឹងក្លាយជាការធ្វើដំណើរទស្សនកិច្ចលើកទី ៦ របស់លោក Witkoff ទៅកាន់រុស្ស៊ី ចាប់តាំងពីខែមករាមក។

គួរបញ្ជាក់ថា សេចក្តីព្រាងផែនការសន្តិភាព បានលេចឡើង ស្របពេលមានសន្ទុះឡើងវិញនូវកិច្ចការការទូតដែលបានចាប់ផ្ដើមបន្ទាប់ពីសំណើសន្តិភាពដើម ២៨ចំណុច ត្រូវបានលេចធ្លាយនៅតាមសារព័ត៌មាន កាលពីខែមុន។ តាមសេចក្តីរាយការណ៍ សំណុំសំណើដំបូងនោះត្រូវបានរៀបចំឡើងដោយរដ្ឋបាលលោក Trump និងមន្ត្រីវិមានក្រឹមឡាំង។ ក្របខណ្ឌដើមនោះត្រូវបានកាត់បន្ថយមកត្រឹម ២០ចំណុច ហើយមន្ត្រីអាមេរិកបានព្រលយពាក្យថា អ៊ុយក្រែនបានយល់ព្រម ចំពោះកំណែដែលបានកែសម្រួលនេះ៕