សេតវិមាន កាលពីថ្ងៃចន្ទ (ទី២ ខែវិច្ឆិកា) បានប្រាប់ឲ្យដឹងថា ឧត្តមនាវីឯកអាមេរិកដែលបំពេញតួនាទី ក្រោមអំណាចរបស់រដ្ឋមន្ត្រីការពារជាតិ លោក Pete Hegseth បានបញ្ជាឲ្យប្រតិបត្តិការយោធា «វាយប្រហារផ្ទួនលើកទី២» ដែលកំណត់គោលដៅអ្នករួចជីវិតពីការវាយប្រហារដំបូង លើទូកសង្ស័យរត់ពន្ធគ្រឿងញៀន។

ភាពស្របច្បាប់នៃការវាយប្រហារបណ្ដាលឲ្យមានអ្នកស្លាប់ពីសំណាក់រដ្ឋបាលរបស់លោក Donald Trump ប្រឆាំងនឹងអ្នកដែលត្រូវបានចោទប្រកាន់ជួញដូរគ្រឿងញៀន នៅតំបន់ការ៉ាអ៊ីប និងប៉ាស៊ីហ្វិក ត្រូវបានចោទសួររួចហើយ ហើយរបាយការណ៍នៃការវាយប្រហារផ្ទួនលើកទី២ លើអ្នករួចជីវិត បានបង្កឲ្យមានការចោទប្រកាន់បន្ថែមទៀត អំពីលទ្ធភាពនៃការប្រព្រឹត្តិឧក្រិដ្ឋកម្មសង្គ្រាម។

គួរបញ្ជាក់ថា មនុស្សសរុបចំនួន ១១នាក់ហើយ ត្រូវបានសម្លាប់នៅក្នុងការវាយប្រហារ ២លើក កាលពីដើមខែកញ្ញា ដោយនេះជាលើកទី១ នៅក្នុងយុទ្ធនាការយោធារយៈពេលជាច្រើនខែ ដែលរហូតមកដល់ពេលនេះ បានឆក់យកជីវិតមនុស្សជាង ៨០នាក់ហើយ។

រដ្ឋបាលរបស់លោកប្រធានាធិបតី Trump ទទូចថា ខ្លួនកំពុងធ្វើសង្គ្រាមជាមួយ «ភេរវករគ្រឿងញៀន» ហើយសេតវិមាន បានបញ្ជាក់ថា លោកឧត្តមនាវីឯក Frank Bradley ដែលបច្ចុប្បន្នដឹកនាំទីបញ្ជាការប្រតិបត្តិការពិសេសរបស់សហរដ្ឋអាមេរិក បានធ្វើសកម្មភាពស្របច្បាប់ និងត្រឹមត្រូវ ក្នុងការបញ្ជាឲ្យមានការវាយប្រហារផ្ទួនលើកទី២ លើអ្នករួចជីវិត។

អ្នកនាំពាក្យសេតវិមាន លោកស្រី Karoline Leavitt បានប្រាប់អ្នកសារព័ត៌មានថា លោក Bradley «បានធ្វើការបានយ៉ាងល្អនៅក្នុងរង្វង់សិទ្ធិអំណាចរបស់លោក និងក្នុងរង្វង់ច្បាប់ដែលអនុញ្ញាតឲ្យមានការវាយប្រហារនោះ ដើម្បីធានាបានថា ទូកត្រូវបានកម្ទេច ហើយការគំរាមកំហែងដល់សហរដ្ឋអាមេរិកត្រូវបានលុបបំបាត់»។ លោកស្រីបានបន្ថែមថា លោក Hegseth «បានអនុញ្ញាតឲ្យលោកឧត្តមនាវីឯក Bradley ធ្វើការវាយប្រហារទាំងនេះ»៕