បន្ទាប់ពីបានជួបជាមួយនាយករដ្ឋមន្ត្រីប៉ូឡូញ លោក Donald Tusk នៅទីក្រុងប៊ែរឡាំង អធិការបតីអាល្លឺម៉ង់ លោក Friedrich Merz បាននិយាយថា ប៉ូឡូញ និងអាល្លឺម៉ង់ កំពុងធ្វើការឆ្ពោះទៅរកកិច្ចព្រមព្រៀងសហប្រតិបត្តិការការពារជាតិ នាឆ្នាំក្រោយ ខណៈដែលប្រទេសទាំង ២ សម្លឹងដល់ការលើកកម្ពស់ទំនាក់ទំនង ស្របពេលមានសង្គ្រាមរបស់រុស្ស៊ី នៅអ៊ុយក្រែន។

មេដឹកនាំទាំង២ បានជួបប្រជុំគ្នា សម្រាប់ «ការពិគ្រោះយោបល់អន្តររដ្ឋាភិបាល» កាលពីថ្ងៃចន្ទ (ទី១ ខែធ្នូ) ខណៈដែលរដ្ឋាភិបាលចម្រុះរបស់ប៉ូឡូញដឹកនាំដោយលោក Tusk ដែលជាអ្នកកណ្ដាលនិយម បានធ្វើការប្រាស្រ័យទាក់ទងឡើងវិញ បន្ទាប់ពីទំនាក់ទំនងជាមួយទីក្រុងប៊ែរឡាំង បានជួបនឹងភាពអាប់អួ ក្រោមរដ្ឋាភិបាលជាតិនិយមពីមុនរបស់ប៉ូឡូញ។

លោក Merz បាននិយាយថា អាទិភាពលើវិស័យការពារជាតិ និងសន្តិសុខ នឹងរួមបញ្ចូលសមយុទ្ធយោធារួមគ្នា សម្រាប់កងកម្លាំងជើងគោករបស់ប្រទេសទាំង២ ហើយនិងការតាមរក និងរារាំងយានដ្រូន។ ជាមួយគ្នានេះ លោកបានបន្ថែមថា រដ្ឋមន្ត្រីពីភាគីទាំង២ នឹងធ្វើការលើកិច្ចព្រមព្រៀង ស្តីពីគោលនយោបាយការពារជាតិ។

លើសពីនោះទៀត ជាកាយវិការ ដើម្បីបង្ហាញពីការលើកកម្ពស់ទំនាក់ទំនង លោក Merz បានប្រកាសថា ប្រទេសអាល្លឺម៉ង់បានប្រគល់ទៅវិញនូវឯកសារដ៏មានតម្លៃដែលមានតាំងពីសតវត្សរ៍ទី១៣ ដល់ទី១៥ ដែលពួកណាហ្ស៊ីបានលួចក្នុងអំឡុងពេលកាន់កាប់ប៉ូឡូញ កាលពីសម័យសង្គ្រាមលោកលើកទី២។ លោក Tusk បានសាទរចំពោះការប្រគល់ទៅវិញ «ដែលមិនធ្លាប់មានពីមុន» នូវបណ្ណសារនេះ៕