កងកម្លាំងគាំទ្ររហ័ស (RSF) របស់ប្រទេសស៊ូដង់ កាលពីថ្ងៃចន្ទ (ទី១ ខែធ្នូ) បានប្រាប់ឲ្យដឹងថា ខ្លួនបានវាយដណ្តើមគ្រប់គ្រងបានទាំងស្រុងលើទីក្រុង Babanusa ដែលជាមជ្ឈមណ្ឌលដឹកជញ្ជូនដ៏សំខាន់ នៅភាគខាងត្បូងនៃប្រទេស តែគូអរិរបស់ក្រុមនេះ គឺកងទ័ពស៊ូដង់ បានជំទាស់នឹងការអះអះអាងនេះ។

នៅក្នុងសេចក្តីថ្លែងការណ៍មួយ កាលពីថ្ងៃចន្ទ RSF បានបញ្ជាក់ថា «ការរំដោះ» ទីក្រុង Babanusa នៅរដ្ឋ Kordofan ខាងលិច ដែលជាសមរភូមិជួរមុខចុងក្រោយបងញអស់ក្នុងសង្រ្គាម នៅស៊ូដង់ បានកើតឡើងនៅពេលដែលខ្លួនបានវាយរារាំង និងរុញច្រាន «ការវាយប្រហារដ៏គួរឲ្យភ្ញាក់ផ្អើល» ដោយកងទ័ពស៊ូដង់ ជាអ្វីដែលក្រុមនេះចាត់ទុកថា «ការរំលោភយ់ាងច្បាស់ក្រឡែតលើបទឈប់បាញ់មនុស្សធម៌»។

នៅថ្ងៃអង្គារនេះ កងទ័ពបានបដិសេធថា RSF មិនបានដណ្តើមកាន់កាប់ទីក្រុងនេះទាំងមូលនោះឡើយ ហើយបានចោទប្រកាន់គូអរិរបស់ខ្លួនថា បានបន្តការវាយប្រហារលើទីក្រុង Babanusa បើទោះបីជាមេបញ្ជាការរបស់កងកម្លាំង RSF គឺលោក Mohamed Hamdan Dagalo បានប្រកាស អំពីបទឈប់បាញ់ជាឯកតោភាគីក្ដី។

នៅក្នុងសេចក្តីថ្លែងការណ៍មួយ កងទ័ពបានបញ្ជាក់ថា យុទ្ធជនរបស់ក្រុម RSF បានបើកការវាយប្រហារជារៀងរាល់ថ្ងៃដោយកាំភ្លើងធំ និងយានដ្រូនលើទីក្រុងនេះ ហើយថា កងទ័ពបានវាយរារាំងការវាយប្រហារថ្មីមួយ កាលពីថ្ងៃចន្ទ។

កាលពីថ្ងៃទី១៩ ខែវិច្ឆិកា ប្រធានាធិបតីអាមេរិក លោក Donald Trump បាននិយាយថា លោកនឹងធ្វើអន្តរាគមន៍ ដើម្បីបញ្ឈប់ជម្លោះដែលបានផ្ទុះឡើងដោយសារការតស៊ូដណ្ដើមអំណាច កាលពីខែមេសា ឆ្នាំ២០២៣៕