ទីភ្នាក់ងារគ្រោះមហន្តរាយ បានឲ្យដឹងថា ចំនួនអ្នកស្លាប់ដោយសារគ្រោះទឹកជំនន់ និងបំណាក់ដី នៅកោះស៊ូម៉ាត្រារបស់ប្រទេសឥណ្ឌូនេស៊ី បានឡើងដល់ ៧០៨នាក់យ៉ាងតិច នៅថ្ងៃអង្គារ (ទី២ ខែធ្នូ) នេះ ខណៈដែលអាជ្ញាធរ បានប្រញាប់ប្រញាល់ជួសជុលហេដ្ឋារចនាសម្ព័ន្ធ និងផ្តល់ជំនួយដល់តំបន់ដែលត្រូវបានកាត់ផ្តាច់។

ក្នុងសន្និសីទសារព័ត៌មាន នាល្ងាចថ្ងៃទី២ ខែធ្នូនេះ ទីភ្នាក់ងារបានឲ្យដឹងថា មនុស្សចំនួន ៧០៨នាក់ បានបាត់បង់ជីវិត ចាប់តាំងពីសប្តាហ៍មុន ជាតួលេខទាបជាង ៧៥៣នាក់ដែលត្រូវបានរាយការណ៍នៅលើគេហទំព័ររបស់ខ្លួន កាលពីព្រឹកថ្ងៃនេះ។ ស្ថាប័នមិនបានផ្តល់ហេតុផល ពាក់ព័ន្ធនឹងតួលេខខុសគ្នានេះឡើយ។

គួរបញ្ជាក់ថា មនុស្សជិត ៩០០នាក់ បានស្លាប់ក្នុងគ្រោះទឹកជំនន់ និបំណាក់ដី ដែលបានបង្កឲ្យមានការបំផ្លិចបំផ្លាញយ៉ាងធ្ងន់ធ្ងរ នៅក្នុងប្រទេសឥណ្ឌូនេស៊ី ម៉ាឡេស៊ី និងថៃ ដែលកើតឡើងជាច្រើនខែក្រោយមានអាកាសធាតុអាក្រក់ខ្លាំងបំផុត នៅតំបន់អាស៊ីអាគ្នេយ៍ ក្នុងនោះរួមទាំងព្យុះទីហ្វុងជាបន្តបន្ទាប់ បានបោកបក់លើប្រទេសហ្វីលីពីន និងវៀតណាមផងដែរ។

ទីភ្នាក់ងារគ្រោះមហន្តរាយឥណ្ឌូនេស៊ី បានឲ្យដឹងថា ក្រុមកំពុងផ្តល់អាទិភាពដល់ការចែកចាយជំនួយតាមផ្លូវគោក ផ្លូវទឹក និងផ្លូវអាកាស សម្អាតផ្លូវដែលត្រូវបានបិទ និងជួសជុលហេដ្ឋារចនាសម្ព័ន្ធដែលខូចខាត។ អ្នកនាំពាក្យ លោក Abdul Muhari បាននិយាយថា៖ «យើងសង្ឃឹមថា យើងអាចចែកចាយជំនួយយ៉ាងឆាប់រហ័ស»៕