ក្រុមអ្នកជំនាញបរិស្ថានក្នុងស្រុក និយាយថា ការកាប់បំផ្លាញព្រៃឈើ និងការទាញយកធនធានធម្មជាតិ បានរួមចំណែកយ៉ាងសំខាន់បណ្តាលឲ្យមានទឹកជំនន់ធ្ងន់ធ្ងរ ក្រោយព្យុះត្រូពិកដ៏កម្រនាំមកជាមួយភ្លៀងធ្លាក់ខ្លាំងនៅកោះស៊ូម៉ាត្រា ប្រទេសឥណ្ឌូនេស៊ី កាលពីសប្តាហ៍មុន ។

យោងតាមតួលេខផ្លូវការបានឲ្យដឹងថា មនុស្សជាង ៦០០នាក់ ត្រូវបានបញ្ជាក់ថាស្លាប់ នៅក្នុងហេតុការណ៍បំណាក់ដី និងទឹកជំនន់ដ៏គំហុក ។

លោក Tommy Adam គឺជាប្រធានក្រុមតស៊ូមតិបរិស្ថានខេត្តស៊ូម៉ាត្រាខាងលិចនៃវេទិកាបរិស្ថានឥណ្ឌូនេស៊ី និយាយប្រាប់ទីភ្នាក់ងារព័ត៌មានរ៉យទ័រថា គ្រោះមហន្តរានេះ មិនមែនជាគ្រោះមហន្តរាយធម្មជាតិនោះទេ ។ នេះគឺជាគ្រោះមហន្តរាយអេកូឡូស៊ី បង្កឡើងដោយសារការគ្រប់គ្រងមិនបានល្អធនធានធម្មជាតិដោយរដ្ឋាភិបាល ។

ការកាប់បំផ្លាញព្រៃឈើគឺជាបញ្ហាជាយូរមកហើយសម្រាប់ប្រទេសឥណ្ឌូនេស៊ីដែលជាប្រទេសសេដ្ឋកិច្ចធំបំផុតប្រចាំតំបន់អាស៊ីអាគ្នេយ៍នោះ បានប្រឈមការរិះគន់ ។ ជាតំបន់ព្រៃក្រាស់ ប្រទេសមួយនេះ ហាក់ចង់បញ្ច្រាស់ទិសការបំផ្លិចបំផ្លាញ ប៉ុន្តែងាកទៅរកធនធានធម្មជាតិដ៏ច្រើនលើសលុបរបស់ខ្លួន ដើម្បីជំរុញកំណើនសេដ្ឋកិច្ច ។

យោងតាមការអះអាងរបស់ក្រុមឃ្លាំមើលព្រៃឈើសកលដែលជាក្រុមតាមដានអន្តរជាតិ បានឲ្យដឹងថា ចន្លោះឆ្នាំ ២០០១ និងឆ្នាំ ២០២៤ ខេត្តស៊ូម៉ាត្រាខាងជើង បាត់បង់ព្រៃឈើលើផ្ទៃដីទំហំ ១,៦លានហិចតា ដែលស្មើនឹង ២៨ភាគរយនៃដីព្រៃឆ្នាំ ២០០០ ៕