ក្រុមសង្គ្រោះបន្ទាន់បានប្រញាប់ប្រញាល់ទៅរកអ្នករស់រានមានជីវិត និងស្វែងរកសាកសពបន្ថែមទៀតកាលពីថ្ងៃអង្គារ២ធ្នូសប្ដាហ៍នេះ ខណៈចំនួនអ្នកស្លាប់ដោយសារទឹកជំនន់ និងបំណាក់ដីដ៏មហន្តរាយកាលពីសប្តាហ៍មុនបានកើនឡើងដល់ជាង ១.៣០០នាក់នៅក្នុងប្រទេសឥណ្ឌូនេស៊ី ស្រីលង្កា និងថៃ ដោយមានមនុស្សជិត ១.០០០នាក់បាត់ខ្លួន។   

ភ្លៀងមូសុងធ្លាក់ខ្លាំងជាច្រើនថ្ងៃបានជន់លិចតំបន់ធំៗ ដែលធ្វើឱ្យមនុស្សរាប់ពាន់នាក់ជាប់ខ្លួន និងមនុស្សជាច្រើនជាប់នៅលើដំបូលផ្ទះ និងដើមឈើរង់ចាំជំនួយ។ ក្រុមអាជ្ញាធរបាននិយាយកាលពីថ្ងៃអង្គារថា ទឹកជំនន់ និងបំណាក់ដីបានសម្លាប់មនុស្សយ៉ាងហោចណាស់ ១.៣៤៧នាក់ ក្នុងនោះ ៧៥៣នាក់នៅឥណ្ឌូនេស៊ី ៤១០នាក់នៅស្រីលង្កា ១៨១នាក់នៅថៃ និង៣នាក់នៅម៉ាឡេស៊ី។ ប្រធានាធិបតីស្រីលង្កា លោក Anura Kumara Dissanayakeនិយាយថា វាលឿនពេកក្នុងការកំណត់ចំនួនអ្នកស្លាប់ពិតប្រាកដនៅក្នុងប្រទេសរបស់លោក។

នៅឥណ្ឌូនេស៊ី ជាប្រទេសដែលរងគ្រោះខ្លាំងបំផុត ក្រុមជួយសង្គ្រោះបានព្យាយាមចូលទៅកាន់ភូមិនានានៅលើកោះស៊ូម៉ាត្រា ជាទីដែលផ្លូវថ្នល់ត្រូវបានទឹកហូរកួចកាត់ផ្ដាច់ និងស្ពានបានបាក់រលំ។ មនុស្សយ៉ាងហោចណាស់៦៥០នាក់នៅតែបាត់ខ្លួន នេះបើយោងតាមទីភ្នាក់ងារគ្រប់គ្រងគ្រោះមហន្តរាយជាតិរបស់ប្រទេសនេះ។ ឧទ្ធម្ភាគចក្រ និងទូកត្រូវបានដាក់ពង្រាយ ប៉ុន្តែមន្ត្រីបានព្រមានថា អាកាសធាតុកាន់តែអាក្រក់ និងហេដ្ឋារចនាសម្ព័ន្ធដែលខូចខាតកំពុងធ្វើឱ្យប្រតិបត្តិការយឺតយ៉ាវ។ នេះគឺជាគ្រោះមហន្តរាយដ៏សាហាវបំផុតក្នុងប្រទេសឥណ្ឌូនេស៊ីចាប់តាំងពីគ្រោះរញ្ជួយដី និងរលកយក្សស៊ូណាមិឆ្នាំ ២០១៨ នៅកោះស៊ូឡាវេស៊ី ដែលបានសម្លាប់មនុស្សជាង ៤.៣០០ នាក់។  

នៅភាគខាងត្បូងប្រទេសថៃ ការសម្អាតបានចាប់ផ្តើមនៅតាមដងផ្លូវ និងនៅក្នុងអគារនានា បន្ទាប់ពីទឹកជំនន់ដ៏ធំបានប៉ះពាល់ដល់គ្រួសារជាង ១,៥ លានគ្រួសារ និងមនុស្ស ៣,៩ លាននាក់។ ក្រុមអាជ្ញាធរកំពុងស្តារហេដ្ឋារចនាសម្ព័ន្ធឡើងវិញ រួមទាំងបណ្ដាញទឹក និងអគ្គិសនី៕