ក្រុមប្រឹក្សាអឺរ៉ុប បាននិយាយនៅថ្ងៃពុធ (៣ ធ្នូ) នេះថា ខ្លួនបានឈានដល់កិច្ចព្រមព្រៀងមួយ ជាមួយសភាអឺរ៉ុប ស្តីពីការផ្អាកការនាំចូលឧស្ម័នពីរុស្ស៊ី នៅត្រឹមឆ្នាំ២០២៧ ដែលជាផ្នែកនៃកិច្ចខិតខំប្រឹងប្រែងដើម្បីបញ្ចប់ការពឹងផ្អែកលើថាមពលរបស់រុស្ស៊ី។

កិច្ចព្រមព្រៀងនេះនឹងរួមបញ្ចូលការហាមឃាត់ជាជំហានៗស្របច្បាប់ លើការនាំចូលឧស្ម័នធម្មជាតិរាវ (LNG) និងការនាំចូលឧស្ម័នតាមបំពង់បង្ហូរពីប្រទេសរុស្ស៊ី ជាមួយនឹងការហាមឃាត់ពេញលេញចាប់ផ្ដើមពីចុងឆ្នាំ២០២៦ និងរដូវស្លឹកឈើជ្រុះឆ្នាំ២០២៧ រៀងគ្នា។

ការិយាល័យសារព័ត៌មានរបស់ក្រុមប្រឹក្សាសហភាពអឺរ៉ុប បាននិយាយក្នុងសេចក្ដីប្រកាសលើបណ្ដាញសង្គម X ថា "បទប្បញ្ញត្តិនេះ នឹងរួមចំណែកដល់ការបញ្ចប់ការពឹងផ្អែកលើឧស្ម័នរុស្ស៊ី និងពង្រឹងសន្តិសុខថាមពលរបស់សហភាពអឺរ៉ុប"។

គិតត្រឹមខែតុលា កន្លងទៅ រុស្ស៊ីមានចំនួន ១២% នៃការនាំចូលឧស្ម័នរបស់សហភាពអឺរ៉ុប ដោយធ្លាក់ចុះពីអត្រា ៤៥% មុនពេលប្រតិបត្តិការយោធាលើអ៊ុយក្រែន ក្នុងឆ្នាំ២០២២ ដោយហុងគ្រី បារាំង និងបែលហ្ស៊ិក ស្ថិតក្នុងចំណោមប្រទេសដែលនៅតែទទួលទិញឧស្ម័នពីរុស្ស៊ី។ ពាណិជ្ជករ និងក្រុមហ៊ុនថាមពលសកល កំពុងឃ្លាំមើលយ៉ាងដិតដល់នូវជំហានរបស់ប្លុកអឺរ៉ុប លើឧស្ម័នរុស្ស៊ី និងការផ្លាស់ប្តូររបស់ខ្លួនទៅអ្នកផ្គត់ផ្គង់ជំនួស ដូចជាសហរដ្ឋអាមេរិក និងបណ្តាប្រទេសមជ្ឈិមបូព៌ាជាដើម៕