ជើងហោះហើរដែលបានកំណត់ពេលពីប្រទេសចិនទៅកាន់ប្រទេសជប៉ុនប្រហែល ៤០%នៅក្នុងខែធ្នូនេះ ត្រូវបានលុបចោល ដែលមានចំនួនសរុបជាង ១.៩០០ ជើងហោះហើរ នេះបើយោងតាមវេទិកាទេសចរណ៍ Umetrip កាលពីថ្ងៃចន្ទដើមសប្ដាហ៍នេះ។

បន្ទាប់ពីថ្ងៃទី ១៥ ខែវិច្ឆិកា ចំនួនអ្នកធ្វើដំណើរទៅកាន់ប្រទេសជប៉ុនបានមើលឃើញការធ្លាក់ចុះគួរឱ្យកត់សម្គាល់។ ឧទាហរណ៍ នៅថ្ងៃទី ២៥ ខែវិច្ឆិកាតែមួយថ្ងៃ ចំនួនអ្នកដំណើរបានថយចុះប្រហែល ២៣ % បើប្រៀបធៀបទៅនឹងតួលេខពី១០ថ្ងៃមុន។    

យោងតាមប្រព័ន្ធផ្សព្វផ្សាយជប៉ុន លោក Yoshiyuki Yamatani ប្រធានអាកាសយានដ្ឋាន Kansai បាននិយាយកាលពីថ្ងៃចន្ទថា ជើងហោះហើររវាងអាកាសយានដ្ឋានអន្តរជាតិ Kansai និងប្រទេសចិនត្រូវបានគេរំពឹងថានឹងត្រូវបានកាត់បន្ថយប្រហែល៣៤%នៅក្នុងសប្តាហ៍ទីពីរនៃខែធ្នូ។  លោក Yamatani បានបង្ហាញថា ស្ថានភាពនាពេលអនាគតនៅតែមិនច្បាស់លាស់។  

អាកាសយានដ្ឋាន Kansai គ្រប់គ្រងប្រតិបត្តិការនៃអាកាសយានដ្ឋានអន្តរជាតិ Kansai អាកាសយានដ្ឋាន Osaka Itami និងអាកាសយានដ្ឋាន Kobe នៅក្នុងប្រទេសជប៉ុន។

ការធ្លាក់ចុះនៃការដឹកជញ្ជូនតាមផ្លូវអាកាសដឹកអ្នកដំណើររវាងចិន និងជប៉ុន បានកើតឡើងស្របពេលមានភាពតានតឹងក្នុងទំនាក់ទំនងចិន-ជប៉ុន ដែលបង្កឡើងដោយសេចក្តីថ្លែងការណ៍បង្កហេតុរបស់នាយករដ្ឋមន្ត្រីជប៉ុនលោកស្រី Sanae Takaichi ស្តីពីតំបន់តៃវ៉ាន់របស់ចិន កាលពីថ្ងៃទី ៧ វិច្ឆិកា ដោយក្នុងនោះលោកស្រីបានអះអាងថា ស្ថានភាពបន្ទាន់របស់តៃវ៉ាន់អាចបង្កើតបានជាស្ថានភាពគំរាមកំហែងដល់ការរស់រានមានជីវិត សម្រាប់ជប៉ុន និងបញ្ជាក់ថា ជប៉ុនអាចអំពាវនាវដល់អ្វីដែលគេហៅថា «សិទ្ធិស្វ័យការពាររួមគ្នា» សម្រាប់អន្តរាគមន៍ប្រដាប់អាវុធនៅច្រកសមុទ្រតៃវ៉ាន់។ សេចក្តីថ្លែងការណ៍មិនត្រឹមត្រូវទាំងនេះបានទាក់ទាញការរិះគន់យ៉ាងខ្លាំងទាំងនៅក្នុងស្រុក និងពីបរទេស៕