ប្រធានាធិបតីសហរដ្ឋអាមេរិកលោក Donald Trump កាលពីថ្ងៃអង្គារ ទី០២ ខែធ្នូ បាននិយាយថា សង្គ្រាមនៅអ៊ុយក្រែនមាន «ភាពស្មុគស្មាញ» ហើយពុំមែនជាស្ថានភាពងាយស្រួលដើម្បីដោះស្រាយនោះទេ នេះបើយោងតាមការថ្លែងលើកឡើងនៅពេលចាប់ផ្តើមកិច្ចប្រជុំគណៈរដ្ឋមន្ត្រីចុងក្រោយរបស់លោកក្នុងឆ្នាំ២០២៥នេះ។

ប្រធានាធិបតីរុស្ស៊ីលោក Vladimir Putin បានជួបជាមួយបេសកជនពិសេសរបស់លោក Trump គឺលោក Steve Witkoff និងកូនប្រសារ លោក Jared Kushner នៅវិមានក្រឹមឡាំងកាលពីថ្ងៃអង្គារ ដើម្បីពិភាក្សាអំពីមធ្យោបាយដែលអាចធ្វើទៅបានដើម្បីបញ្ចប់ជម្លោះនៅអឺរ៉ុបដ៏បង្ហូរឈាមបំផុត ចាប់តាំងពីសង្គ្រាមលោកលើកទី២មក។

នៅមុនពេលកិច្ចប្រជុំ លោកPutin បានព្រមានអឺរ៉ុបថា អឺរ៉ុបនឹងប្រឈមការបរាជ័យភ្លាមៗ ប្រសិនបើខ្លួនធ្វើសង្គ្រាមជាមួយរុស្ស៊ី ហើយលោកបានច្រានចោលសំណើប្រឆាំងតបរបស់អឺរ៉ុបលើបញ្ហាអ៊ុយក្រែន ថាជាការមិនអាចទទួលយកបានទាំងស្រុងចំពោះរុស្ស៊ី។

លោក Trump បាននិយាយដដែលៗថា លោកមានបំណងបញ្ចប់សង្គ្រាម ប៉ុន្តែកិច្ចខិតខំប្រឹងប្រែងរបស់លោករហូតមកដល់ពេលនេះ រួមទាំងជំនួបកំពូលជាមួយលោក Putin នៅ Alaska កាលពីខែសីហា និងជំនួបជាមួយប្រធានាធិបតីអ៊ុយក្រែន លោក Volodymyr Zelenskiy ពុំទាន់បាននាំមកនូវសន្តិភាពនៅឡើយ។